Türkmenabatlylar ýerli alkogolsyz gazly içgileriň we şerbetleriň hilinden ‘şikaýat edýär’
Şeýle-de, ýerli lukmanlar bularyň önümçiliginde doly barlagdan geçmedik serişdeleriň ulanylýandygyny, munuň hem soňy bilen onkologiýa hassalygyna ýol açyp biljekdigini duýdurýarlar.
“1,5 litrlik Coca-Cola 25 manatdan satylsa, muňa meňzetme hökmünde öndürilen ýerli içgiler bäş manatdan ýerlenýär. Tomsuň jöwzasynda adamlar, şol sanda çagalar, bahadaky tapawut sebäpli, ýerli içgilere has köp ýykgyn edýärler” diýip, Lebabyň merkezi şäheri Türkmenabadyň ýaşaýjylarynyň biri habarçymyza gürrüň berdi.
Ýöne ol ýerli suwlaryň käbiriniň düýbünde çökündileriň emele gelýändigini, şeýle-de gaby açylanda, onuň has köp köpürjikleýändigini belleýär.
“Bularda tagam-tagsyr hem ýok. Bulgura guýlanda, onuň ýarpysyndan hem köpüni köpürjek düzýär, wagtyň geçmegi bilen onuň düýbünde çökündiler hem peýda bolýar. Bulary içeniňden soňam, dişleriňde gara tegmiller galýar” diýip, söhbetdeşimiz 3-nji awgustda aýtdy.
Habarçymyz bu hili ýagdaýlary şerbetli miweli suwlaryň mysalynda hem synlasa bolýandygyny nygtady.
Şol bir wagtda, ýerli saglyk işgärleri bu suwlary öndürmek üçin, daşary ýurtlardan getirilýän serişdeleriň talaba laýyk barlagdan geçirilmeýändigini aýdýarlar, we munuň soňy bilen saglyk meselelerine, şol sanda onkologiýa hassalygyna ýol açyp biljekdigini duýdurýarlar.
Bu mesele boýunça Azatlygyň habarçysy bilen söhbetdeş bolan saglyk işgäri telekeçileriň getirýän serişdelerini paranyň öwezine talaba laýyk barlagdan geçirmän, degişli güwanalarany alýandyklaryny aýtdy. Ol bularyň, şol sanda miweli şerbetleri öndürmek üçin getirilýän poroşoklaryň düzüminde-de düwnük keseliniň ýaýramgyna getirip biljek howply jisimleriň bolmagynyň mümkindigini duýdurdy.
Azatlyk türkmenabatly lukmanyň bu aýdanlaryny resmi ýagdaýda tassykladyp bilmedi. Bu barada sebitiň “Türkmenstandartlary” gullugyndan hem maglumat ýa teswir almak başartmady.
Emma soňky döwür türkmen häkimiýetleriniň raýatlary, hususan-da zenanlary mümkin düwnük keseli boýunça medisina barlaglaryndan köpçülikleýin geçirýändigi barada maglumatlar gowuşýar. Muňa ýurtda aýal-gyzlaryň arasynda onkologiýa keseliniň ähli görnüşleriniň aşa köpelmeginiň sebäp bolýandygy bellenilýär.
Türkmenistanda Coca-Cola içgileriniň gytçylygym2017-nji aýagynda döräp başlady.
Kompaniýanyň resmi websaýtynda çap bolan maglumatda 1998-nji ýyldan bäri Türkmenistanyň çäginde hereket edýän “Coca-Cola Türkmenistanyň” 2009-njy ýylda Coca-Cola İçecek kompaniýasynyň eýeçiligine geçip, 350 adamdan gowrak işgärine eýe bolan bir zawody bilen 6 million adamy üpjün edendigi habar berilýär.
Habarçylarymyz şu günki gün Türkmenistanda “Coca-Cola" kompaniýasynyň Dubaýda, Özbegistanda we Eýranda öndürilen önümleriniň satylýandygyny aýdýarlar. Emma olaryň diňe seýrek söwda nokatlarynda tapdyrýandygy we olaryň bahasynyň köpler üçin elýetersizdigi bellenilýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.