Eýranyň nebit ministri Jawad Owji öz ýurdunyň öňki ýyllarda edilen gaz importy üçin Türkmenistana bolan bergileriniň doly üzülendigini aýdýar. Türkmenistan 2 milliard dollar möçberindäki tölegiň, üstünde uly çekeleşik bolan gaz bergisiniň haçan we nähili ýagdaýda üzilendigi barada açyk maglumat bermeýär.
Eýran mediasynyň habaryna görä, ol üçünji gün geçirilen hökümet mejlisiniň gapdalynda žurnalistler bilen söhbetdeş bolup, prezident Ebrahim Raisiniň administrasiýasynyň işe başlan wagtyndan bäri bu bergini üzmek üçin köp tagalla edendigini aýtdy.
Bu habar Türkmenistanyň halk maslahatynyň başlygy Gurbanguly Berdimuhamedowyň Eýrana eden saparynyň yz ýanyna gabat geldi.
"Bagtymyza, soňky 20 aýyň içinde görlen gowy çäreler netijesinde türkmen tarapyna berilmeli bergini üç bölekde doly töledik we berilmeli asyl bergi doly möçberinde üzüldi" diýip, ol hiç bir san getirmezden aýtdy.
Habarda bu iki ýurduň ikisiniň hem dünýädäki iň uly tebigy gaz öndürijileriň hataryna girýändigi bellenilýär.
Ýurduň günortasyndaky uly tebigy gaz ýataklarynda eýe bolan gaz gorlaryna garamazdan, Eýran 1997-nji ýylda Türkmenistandan gaz satyn almaga başlady. Bu ýangyç bir tarapdan gyş aýlarynda ýurduň demirgazyk sebitlerinde sarp etmek üçin ulanylsa, ikinji tarapdan çalyşmak maksady bilen import edilýär.
Eýran, çalyşmak şertnamasyna laýyklykda, Türkmenistandan häzir içerki zerurlyklary üçin günde 5-6 million kub metr tebigy gaz import edýär we oňa derek Azerbaýjana öz gazyny iberýär.
Eýran metbugaty bu iki ýurduň hepdäniň başynda geçiren gepleşiklerinde ykdysady we energiýa hyzmatdaşlygyny giňeltmek üçin bäş şertnama gol çekendigini habar berdi.
Owji Eýranyň Türkmenistan we beýleki goňşy ýurtlar bilen baglaşylan täze şertnamalara gol çekmek bilen, ýurduň gaz söwdasyny has giňeltmegine umyt bildirdi.
Türkmen metbugaty we resmileri, goňşy ýurduň mediasyndan we resmilerinden tapawutlylykda, Eýran bilen arada dörän töleg meseleleri, olaryň çözgüdi hakynda ilata maglumat bermegi zerur hasaplamaýar.
Halkara Arbitraž sudunyň çykaran kararyna görä, Eýran 2007-2013-nji ýyllar aralygynda Türkmenistandan satyn alan gazy üçin Aşgabada 2 milliard dollar möçberinde pul tölemeli edildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
