“Dok-1 Maks” üsgülewük şerbetini içip, Özbegistanda azyndan 19 çaga ýogalanyndan soň, Hindistanyň milli düzgünleşdiriş edarasy 29-njy dekabrda bu şerbeti öndürýän kärhananyň, “Marion Biotech” derman kompaniýasynyň zawodynda geçirilen barlag barada habar berdi.
Kompaniýanyň metbugat wekiliniň aýtmagyna görä, “Marion Biotech” tabletka görnüşinde hem öndürilýän “Dok-1 Maks” şerbetiniň önümçiligini togtatdy.
Derman serişdelerine gözegçilik edýän merkezi gurama kompaniýanyň Hindistanyň paýtagtynyň golaýynda ýerleşýän önümçilik kärhanasynda derňew geçirendigini, şol bir wagtda Özbegistanyň Saglyk ministrligi bilen hem aragatnaşyk saklaýandygyny aýtdy.
Bu dermanyň Özbegistandaky satuwy 22-nji dekabrda, hindi dermanyny içen onlarça çaga keselhana ýerleşdirilip, olaryň birnäçesi heläk bolanyndan soň togtadyldy. "Dok-1 Maks" şerbeti we tabletkalary dermanhanalardan hem ýygnalyp alyndy.
Özbek metbugatynyň geçirilen barlaglara salgylanyp ýazmagyna görä, ýurtda satylýan “Dok-1 Maks” şerbetleriniň düzüminden zäherli madda bolan etilenglikol tapyldy.
