BMG Eýran protestlerindäki ölümlere alada bildirýär, häkimiýetler nägilelikleri çözmeli diýýär
"Biz protestçileriň ölümine ýa-da agyr ýaralanmagyna sebäp bolan ähli hadysalary ýazgarýarys we howpsuzlyk güýçleriniň parahatçylykly demonstrantlara garşy zerur däl ýa-da nädogry güýç ulanmakdan gaça durmalydygyny tekrarlaýarys" diýip, BMG-niň metbugat sekretary Stefan Dujarric 28-nji oktýabrda Nýu-Ýorkda aýtdy.
"Jogapkärler jogapkärçilige çekilmelidir" diýip, ol BMG-niň Tährany "ilatyň kanuny nägileliklerini, şol sanda aýallaryň hukuklaryna hormat goýmak meselesini çözmäge" çagyrýandygyny hem aýtdy.
BBM Tährandaky eýran hökümetini adam hukuklaryna hormat goýmaga çagyrdy we krizisi gepleşikler arkaly gözegçilikde saklap boljakdygyny nygtady.
22 ýaşly Amini 16-njy sentýabrda Tähranda, hijabyny düzüw örtünmezlikde aýyplanyp tussag edileninden üç gün soň, polisiýa gözegçiliginde aradan çykmagy ýurduň şäherlerinde hökümete garşy nägilelik tolkunyny döretdi.
28-nji oktýabrda Eýranyň günorta-gündogaryndaky Zahedan şäherinde protestçiler howpsuzlyk güýçleri bilen ýene çaknyşdylar. Bu şäherde dört hepde öň geçirilen hökümete garşy protestlerde onlarça adam ölüpdi.
Eýranyň Osloda ýerleşýän Adam hukuklary topary howpsuzlyk güýçleriniň ot açandygyny we 12 ýaşly bir oglan bilen birlikde ölenleriň bolandygyny habar berdi.
Döwlet telewideniýesi Zahedan şäherinde bir adamyň ölendigini we 14 adamyň ýaralanandygyny aýtdy.