13-nji awgustda Hytaýyň gündogaryndaky Jiangsu sebitiniň Wuaksi (Wuxi) şäherinden ýola çykan ýük otlusy Merkezi Aziýa barar diýip, Hytaýyň "Ženmin žibao" gazeti habar berdi.
Neşiriň maglumatyna görä, ýük otlusy 1000 tonna ýüki, şol sanda durmuş tehnikasyny, awtoulag böleklerini, jemi 30 million ýuana (takmynan 4,4 million dollar) harytlary alyp gelýär. Bu otly 20 gün çemesi wagt içinde Özbegistana we Gazagystana gelip ýetmeli.
“Wuaksi West Station Logistika parkynda aýtmaklaryna görä, pandemiýa başlanandan soň ýerli daşary söwda kärhanalary haryt eksport etmekde kynçylyk çekip başlady we täze demir ýol ýük ugrunyň açylmagy bu kärhanalar üçin täze mümkinçilikleri döreder” diýip, neşir belleýär.
“Sinhua” habar gullugy geçen ýylyň dekabrynda Hytaýyň Şensi sebitinden Özbegistana we Gazagystana ýük otlularynyň gatnawynyň ýola goýulýandygyny habar berdi.
Şol bir wagtda, soňky hepdelerde Hytaý-Gyrgyzystan-Özbegistan demirýol taslamasy boýunça alnyp barylýan işleriň birneme janlanandygy aýdylýar.
Ozal bu taslama barada Özbegistanyň we Gyrgyzystanyň prezidentleri we iki ýurduň hökümetleriniň käbir resmileri beýanat edipdi.