2015-nji ýylda Eýran bilen baglaşylan ýadro şertnamasyny dikeltmek üçin täzeden başlanan gepleşiklere gatnaşan ýokary derejeli gepleşikçiler bu meselede ylalaşmak mümkinçiligine umytly garaýandyklaryny aýtdylar.
Ýewropa Bileleşiginiň ýokary derejeli gepleşikçisi Enrike Mora hepde aýagynda gepleşikleriň barşyndan çen tutup, özüniň öňegidişlik gazanyljagyna “doly” umyt bilen garaýandygyny aýtdy.
“Biz ilerleýäris we men bu gepleşikleriň basym jemlenmegine garaşýaryn” diýip, Enrike Mora, Ýewropa Bileleşiginiň baş gepleşikçisi 7-nji awgustda eýran metbugatyna aýtdy. Rus ilçisi Mihail Ulýanow bolsa 7-nji awgustda bu ýerde çözülmedik “3 ýa 4 meseläniň” galandygyny aýtdy.
"Biz ahyrky pellehanadan 5 minut ýa-da 5 sekunt uzaklykda durýarys" diýip, Ulýanow žurnalistlere gepleşikleriň geçirilýän Koburg Palaýs myhmanhanasynyň daşynda durup aýtdy. “Olar hususan-da eýranlylar we amerikanlar üçin ynjyk” diýip, ol sözüniň üstüni ýetirdi.
"Men kepil geçip bilemok, ýöne biz dogry ugurdan barýarys diýip oýlanýaryn” diýip, Ulýanow aýtdy.
Eýranly, ABŞ-ly we Ýewropa Bileleşiginden bolan gepleşikçiler, birnäçe aýlap dowam eden arakesmeden soň, 4-nji awgustda Tähranyň ýadro şertnamasy baradaky gytaklaýyn gepleşiklere täzeden başladylar.
