Gazagystanyň Milli howpsuzlyk komitetiniň öňki başlygy Karim Masimowyň tussagda saklanmak möhleti 6-njy maýa çenli uzaldyldy diýip, ýerli metbugat habar berýär.
Şeýle-de, Milli howpsuzlyk komitetiniň başlygynyň öňki orunbasarlary Anuar Sadykulowyň we Daulet Ýergožiniň tussag astynda saklanmaly möhletleri degişlilikde 6-njy we 8-nji maýa çenli uzaldyldy diýip, habarlarda aýdylýar.
56 ýaşyna çenli Gazagystanyň hökümetine iki gezek ýolbaşçylyk eden, MHK-nyň öňki başlygy Masimow "döwlete dönüklik" etmekde aýyplanýar.
6-njy ýanwarda, Gazagystanda bolan halk gozgalaňlarynyň ganly çaknyşyklara getirmeginiň yz ýanynda MHK-nyň başlygy wezipesinden aýrylan Masimowyň tussag edilendigini gazak häkimiýetleri habar berdi.
Karim Masimow köp ýyllap öňki prezident Nursoltan Nazarbaýewiň "ynamdar" adamy boldy. Onuň jenaýat işiniň "doly gizlinlik" ýagdaýynda derňelýändigi aýdylýar.
