Mýanmada harby agdarylyşyk boldy
Harbylaryň gözegçiligindäki "Myawaddy" teleýaýlymy, 1-nji fewralda saýlawlar baradaky dawa-jenjeliň arasynda “durnuklylygy” goramak üçin bir ýyllyk adatdan daşary ýagdaý yglan etdi.
Okalan beýanatda täze ýerine ýetiriji prezidentiň wise-prezident bolan öňki general Myint Swe boljagy aýdylýar.
Beýanatda harby başlyk general Min Aung Hlaingiň "kanunçylyga, dolandyryş we kazyýet ulgamyna" gözegçilik edýändigi yglan edilýär.
Bu habar harby güýçler Su Çini, prezident Win Myinti we dolandyryjy Milli Demokratiýa Ligasynyň (NLD) beýleki ýokary derejeli şahsyýetleri tussag edenlerinden birnäçe sagat soň edildi.
Amerikanyň Birleşen Ştatlary, Awstraliýa we beýleki ýurtlar döwlet agdarylyşygyndan we hökümetiň raýat ýolbaşçylarynyň tussag edilmeginden alada galýandygyny mälim etdiler.
Döwlet agdarylyşygy soňky hepdelerde hökümet bilen harby ýolbaşçylaryň arasynda barha artan dartgynlylykdan soň bolup geçdi.
Noýabr aýynda geçirilen saýlawdan soň hökümetiň we harbylaryň arasyndaky gatnaşyklar dartgynlaşdy. Harbylar saýlawlary galp bolandygyny aýtdylar.
NLD saýlawlarda ýeňiş gazanansoň Mejlis 1-nji fewralda işine başlamalydy.