Belarusyň sürgündäki prezidentlige bäsdeşi Swýatlana Tsihanowskaýa ýewropaly kanunçykaryjylara Belarus halkynyň demokratiýa isleginiň Minskdäki häkimiýetleriň rehimsiz basyşy bilen "bozulmajakdygyny" aýtdy.
“Belaruslylar repressiýa, fiziki güýç bilen gorkuzylmagyna we azatlykdan mahrum edilmek baradaky haýbatlara garamazdan, soňky iki hepdäniň dowamynda yza gaýtmajakdyklaryny görkezdiler” diýip, Tsihanowskaýa 25-nji awgustda Ýewropa Parlamentiniň Daşary gatnaşyklar komitetine aýtdy.
Tsihanowskaýa Litwadan wideo aragatnaşyk arkaly eden çykyşynda basyşlar döwründe azyndan alty sany belarus protestçisiniň öldürilendigini we onlarça adamyň polisiýada saklanýan mahaly ýitirim bolandygyny yglan etdi.
Ol özleriniň "syýasy hukuklaryna hormat goýulmagyny", Belarusdaky "ähli syýasy tussaglaryň" boşadylmagyny we belarus häkimiýetleri tarapyndan "zorlugyň we gorkuzmanyň" bes edilmegini hem talap etdi.
“Belarus oýandy. Biz indi oppozisiýa däl. Biz indi köplük” diýip, Tsihanowskaýa 23-nji awgustda Minskiň köçelerine 200 müňden gowrak adamyň çykandygyny we munuň şu wagta çenli geçirilen iň uly protest bolandygyny hem aýtdy.
