Rus alymlary: Täze düzgünler daşary ýurtly kärdeşler bilen gatnaşyklary çäklendirer
Täze çäklendirmeleriň nusgasy ilkinji gezek 13-nji awgustda, Sankt-Peterburgdaky rus alymy tarapyndan ýurduň Ylym we ýokary bilim ministrligine iberilen açyk hatda çap edildi.
Matematik we programmist Aleksandr Fradkow özüniň gol goýan hatynda resmileri bu düzgünleri ýatyrmaga çagyrýar. Şeýle-de, ol onda “biziň daşary ýurtly kärdeşlerimiz bilen ylmy gatnaşyklarymyzy böwetlejek çäklendirmeleriň we bolgusyzlyklaryň” bardygyny aýdýar.
Fradkow bular “biziň ýurdumyzyň abraýyna, şeýle-de ylym we tehnologiýa taýdan ösüşine hem” potensial “zyýan ýetirip biler” diýýär.
Russiýanyň ylym we ýokary bilim ministri Mihail Kotýukow tarapyndan gol goýlan düzgünlerde alymlardan öz daşary ýurtly kärdeşleri bilen duşuşmazdan bäş gün öň, bu barada ministrligiň resmilerini habarly etmek talap edilýär.
Şeýle-de, şuňa meňzeş duşuşykdan soňra alymlardan hasabat bermek we ýygnaga gatnaşanlaryň sanawyny tabşyrmak hem talap edilýär.