ABŞ-nyň wekili we “Talybanyň” esaslandyryjylarynyň biri Katarda duşuşdylar
“Edil şu wagt Molla [Abdul Gani Baradar] we onuň topary bilen öýlänlik naharyny edindik. Bu biziň ilkinji duşuşygymyz boldy. Biz indi gepleşiklere başlaýarys” diýip, Halilzad 25-nji fewralda Twitter hasabatynda ýazgy galdyrdy.
Baradar Pakistanda sekiz ýyl türme tussaglygyndan soň, geçen oktýabrda azatlyga goýberildi. Galyberse-de, Baradar “Talybanyň” syýasy ýolbaşçysy hökmünde bellenildi.
“Talybanyň” metbugat wekili Zabihullah Mujahid planlaşdyrylan dört günlük gepleşikleriň dowamynda “käbir netijeleriň gazanylmagynyň mümkindigini” “The Associated Press” agentligine aýtdy.
Owganystanyň ýarpysyna gözegçilik edýändigi aýdylýan “Talyban” soňky aýlaryň dowamynda Halilzad bilen ençeme tapgyr gepleşikleri geçiripdi.
Emma, jeňçi topary owgan hökümetini “oýnatgy” atlandyryp, onuň wekilleri bilen duşuşmakdan ýüz öwrüp gelýär.