Prezident Berdimuhamedow Tatarystana iş saparyna baryp, Kazanda futbol ýaryşyna tomaşa etdi
Türkmen prezidenti howa menzilinden tatar kärdeşi Rustam Minnihanow bilen Kazanyň merkezinde ýerleşýän “Ideýa” tehnoparkyna bardy we Tatarystanyň senagat mümkinçiliklerine bagyşlanan sergini synlady diýip, TDH habar berýär.
Şeýle-de taraplaryň duşuşygyň barşynda özara bähbitli söwda-ykdysady hyzmatdaşlygy giňeltmegiň mümkinçilikleri, ynsanperwer gatnaşyklary ösdürmek barada maslahat edendikleri habar berilýär.
Sport ulgamy hyzmatdaşlygyň ileri tutulýan ugurlarynyň hatarynda görkezildi.
Duşuşygyň ahyrynda prezidentler Türkmenistan bilen Tatarystan Respublikasynyň däp bolan dostlukly netijeli hyzmatdaşlyk gatnaşyklaryna ygrarlydyklaryny ýene bir gezek tassykladylar.
Soňra türkmen we tatar prezidentleri “Kazan-Arena” stadionyna baryp, 2018-nji ýylyň futbol boýunça dünýä çempionatynyň dörtden bir final duşuşygyna - Braziliýanyň we Belgiýanyň ýygyndy komandalarynyň oýnuna bilelikde tomaşa etdiler. Prezident Berdimuhamedow oýun gutarandan soň Türkmenistana dolandy.
TDH bu saparyň Tatarystanyň prezidentiniň çakylygy esasynda amala aşyrylandygyny habar berýär.