Kiýew, orsýetçi separatistler ýesirleri çalyşmaga taýýarlanýarlar
Separatistler ýesirleri Ukrainanyň hökümetine 27-nji dekabrda Donetsk regionynyň konflikt zonasyndaky front liniýasynda Horliwka şäheriniň golaýynda ýerli wagt bilen öýlän sagat birde tabşyrmaly.
Ukrainanyň hökümet güýçleriniň tussaglary separatistlere agşam tabşyrmaly.
Ukrainanyň häkimiýetleriniň we separatistleriň arasynda ýesirleri çalyşmak boýunça ylalaşyk 25-nji dekabrda tassyklandy.
“74 sany ukrain esgeri separatistler tarapyndan 27-nji dekabrda boşadylar. Biz olary 306 adam bilen çalyşarys” diýip, Ukrainanyň parlamentiniň spikeriniň orunbasary Iryna Heraşçenko aýtdy.
Donetsk regionynda separatistleriň lideri Aleksandr Zaharçenko häzirki çäräniň geljekki ýesir çalyşmalarynyň diňe başlangyjydygyny aýtdy.