Баҳси камбуди нерӯи корӣ дар сохтмонҳои Русия
Вячеслав Володин, раиси Думаи давлатии Русия гуфтааст, ки танҳо 13-15 дарсади коргарон дар сохтмонҳои ин кишвар шаҳрвандони хориҷӣ ё муҳоҷиронанд.
Хабаргузории русии "Интерфакс" аз қавли Володин навиштааст, Вазорати сохтмон ва хоҷагии манзиливу коммуналӣ пайваста аз норасоии нерӯи корӣ дар сохтмонҳо шикоят мекунад.
Ин ниҳод сабаби асосии пеш омадани мушкилро ба сахттар шудани сиёсати муҳоҷират дар Русия рабт додааст.
Вячеслав Володин дар шабакаи иҷтимоии X навиштааст, шумори коргарони хориҷӣ дар сохтмонҳо фақат то 15 дарсадро ташкил медиҳад ва таъкид кардааст, ки нерӯи кории муҳоҷирон ҳам арзон нест.
Ба гуфтаи вай, мушкили камбуди бинокоронро на бо ҷалби муҳоҷирон, балки бо роҳҳои дигар бояд ҳал кард.
Дар гузашта, вазири сохтмони Русия Игор Файзуллин аз эҳтимоли камбуди шадиди нерӯи корӣ дар сохтмонҳо ҳушдор дода буд. Ӯ сабаби ин вазъро, аз ҷумла, ба "сахттар шудани кори муҳоҷирон" рабт дода буд.
Ин баҳс дар ҳоле рӯ задааст, ки пас аз ҳамлаи террористӣ дар толори "Крокус Ситӣ", фишор ва ихроҷи муҳоҷирони кории Осиёи Марказӣ ва махсусан тоҷикон аз Русия ба таври бесобиқа афзоиш ёфт.