Евгений Пригожин, фармондеҳи гурӯзи муздурони "Вагнер" дар паёме савтӣ, ки рӯзи душанбеи 31-уми июл нашр шуд, гуфт, ин гурӯҳ дар ҳоли ҳозир нерӯ ҷамъ намекунад, вале ба эҳтимоли зиёд дар оянда ин корро хоҳад кард.
Дар пайи ошӯби муздурони "Вагнер" зидди фармондеҳони баландпояи нерӯҳои мусаллаҳи Русия дар рӯзи 23-юми июн, сарнавишти ин гурӯҳ ва фармондеҳи он Евгений Пригожин ба норушанӣ рубару шуда буд ва Кремл эълон кард, ки зархаридони "Вагнер" ба Белорус хоҳанд рафт.
Бо вуҷуди суханони тунди Путин алайҳи Пригожин ва таъкиди ӯ ба муҷозоти ошубгарон, раиси ҷумҳури Русия панҷ рӯз пас аз рух додани ошуб, бо Пригоржин ва шуморе аз фармондеҳони "Вагнер" дар Маскав мулоқот кард.
Аксҳо аз нишасти ҳамкориҳои Русия ва Африқо низ, ки ҳафтаи гузашта дар шаҳри Санкт-Петербург баргузор шуд, нишон дод, ки Евгений Пригожин дар ин нишастҳо ҳузур доштааст.
Паёми савтии Евгений Пригожин рӯзи душанбе дар канали телеграмии вобаста ба "Вагнер" нашр шуд. Ӯ дар ин паём мегӯяд, "имруз мо дар ҳоли танзими фаъолиятҳои баъдӣ ҳастем, ки нақшаи умумии он мушаххастар мешавад. Бидуни шак, ин маъмуриятҳо ба номи азамати Русия иҷро хоҳанд шуд".
Кремл пас аз ошӯби муздурони "Вагнер" эълон кард, он даста аз зархаридоне, ки дар ин шуриш ширкат надоштанд, бо Вазорати дифоъ қарордод мебанданд ва ба сафи артиши Русия хоҳанд пайваст.
Оқои Пригожин дар бахши дигаре аз паёми савтии худ, эҳтимолан бо ишора ба ин мавзуъ, гуфт, "мутаассифона" бархе аз афроди "Вагнер" ба "сохторҳои қудрат"-и дигар пайвастанд, вале тамоюл доранд ба ин гурӯҳ бозгарданд.
Ӯ афзуд, "то вақте, ки бо камбуди нерӯ рӯбарӯ нашавем, қасди ҷалби нерӯҳои навро надорем. Бо ин ҳама, аз шумо мехоҳем, ки бо мо дар тамос бошед. Ҳар вақте, ки сарзамини модарӣ ба ташкили воҳидҳои нав барои ҳифозат аз манфиатҳои кишвар ниёз дошта бошад, мо раванди ҷалби нерӯҳои навро оғоз хоҳем кард".
Пас аз ошуби муздурони "Вагнер", шуморе аз нерӯҳои ин гурӯҳ ба Белорус рафтанд ва ба назар мерасад, ки омӯзиши афроди артиши ин кишварро оғоз кардаанд.
Евгениж Пригожин ҳудуди як ҳафта пеш дар миёни муздурони ин гурӯҳ дар пойгоҳе дар хоки Белорус гуфт, ки гурӯҳи "Вагнер" барои густариши амалиёти худ дар Африқо омода аст.
Ҳузур ва дахолати низомии муздурони "Вагнер" дар кишварҳои африқоӣ, ба вижа Молӣ ва Ҷумҳурии Африқои Марказӣ, аз муддатҳо мояи нигаронии кишварҳои ғарбӣ будааст.
Амрико "Вагнер"-ро ба куштор ва озори ғайринизомиён муттаҳам ва ин гурӯҳро ба унвони як "созмони вайронкор" таҳрим кардааст.
Евгений Пригожин иддао дорад, ки фаъолиятҳои муздурони "Вагнер" дар чаҳорчуби қонунҳои кишварҳое сурат мегирад, ки дар онҷо ҷобаҷо ҳастанд.
Ӯ аз табаддулоти низомии ҳафтаи гузашта дар кишвари африқоии Нигер истиқбол ва иддао кард, ки муздурони "Вагнер" метавонанд барои барқарории субот дар он кишвар, кӯмак кунанд.
