Вакили порлумони Қирғизистон Кенжебек Бокоев дар ҷаласаи 27 сентябр таваҷҷуҳи ҳукуматро ба вазъи обанборҳои ин кишвар ҷалб карда, пешниҳод кард, ки манобеи обӣ фурӯхта шаванд.
"Дар обанбори Кирови вилояти Талас 2 ҳазор ҳектар замин зери об мондааст. Мо обро онҷо ҷамъ карда, ба Қазоқистон медиҳем. Бале, беш аз 90%-и обро Қазоқистону Ӯзбекистон ройгон истифода мебаранд. Ҳукумат бояд масъалаи талаби пули обро баррасӣ кунад", - гуфт Бокоев.
Ба гуфтаи вакил, дар худи вилояти Талас ба далели норасоии об нархи маҳсулоти кишоварзӣ ба таври назаррас поин рафта, заҳмати кишоварзонро рӯйпӯш намекунад. Ӯ гуфт, дар онҷо як кило лубиё 30-35 сом (ҳудуди 0,5 доллар) ва олу 7-10 сом аст.
Обанбори Киров соли 1975 бунёд шудааст. Дар он то 550 миллион метри мукааб об ҷой хоҳад шуд. Қирғизистон танҳо 12%-и оби онро истифода карда, боқиро ба Қазоқистон медиҳад.
Қазоқистон дар ивази об ҳамасола обанборро ба маблағи 70 миллион танга (беш аз 194 ҳазор доллар) таъмир мекунад. Вале ҷониби Қирғизистон мегӯяд, ин пул кам аст.