Policia e Kosovës konfirmoi se, pasditen e së martës, ndodhën disa incidente në Zubin Potok dhe Mitrovicë të Veriut, derisa zyrtarët policorë po i shoqëronin autoritetet zgjedhore në këto dy komuna, të banuara me shumicë serbe.
Më herët, disa media serbe raportuan për dy shpërthime në Zubin Potok dhe tri në Mitrovicën e Veriut.
Policia tha se dyshohet se kishte "shkrepje me armë dhe shpërthime".
Ajo nuk dha detaje se kush mund të jetë përgjegjës, por tha se "protestuesit" kanë demoluar zyrat e komisioneve komunale zgjedhore.
Ndërkaq, ministri i Punëve të Brendshme, Xhelal Sveçla, tha se “grupe të organizuara me disa individë të maskuar” kanë sulmuar zyrtarët zgjedhorë dhe policët “me shok bomba dhe të shtëna në ajër”, me qëllim që të parandalojnë ata të kryejnë detyrat e tyre zyrtare.
“Sulme të tilla si ky sot me qëllim të bllokimit të procesit zgjedhor janë të papranueshme. Organizimi i zgjedhjeve është obligim kushtetues ndërsa pjesëmarrja në to është e drejtë e qytetarëve që nuk mund të cenohet nga askush”, tha Sveçla në llogarinë e tij në Facebook.
Policia, po ashtu, tha se Komisioni Qendror i Zgjedhjeve i ka kërkuar ndihmë asaj rreth përgatitjeve për mbajtjen e zgjedhjeve lokale në Mitrovicë të Veriut, Zubin Potok, Leposaviq dhe Zveçan.
Të gjitha këto komuna, të banuara me shumicë serbe në veri të Kosovës, janë pa kryetarë qysh në fillim të nëntorit.
Ata kanë dhënë dorëheqje, në shenjë kundërshtimi ndaj një vendimi të Qeverisë së Kosovës për të riregjistruar makinat me targa ilegale serbe në veri.
Presidentja e Kosovës, Vjosa Osmani, ka shpallur më pas 18 dhjetorin si datë për mbajtjen e zgjedhjeve atje.
Lista Serbe - partia më e madhe e serbëve në Kosovë, e cila mbështetet nga Beogradi zyrtar dhe ka udhëhequr komunat në veri - i kundërshton këto zgjedhje.
Nga Komisioni Qendror i Zgjedhjeve në Kosovë konfirmuan për REL-in se zyrtarët komunalë të zgjedhjeve shkuan të martën në zyrat e tyre në Mitrovicë të Veriut dhe në Zubin Potok, "me qëllim të ushtrimit të detyrave zyrtare", por se një gjë e tillë "nuk ka qenë e mundur".
Radoniqi: Nuk mund të rrezikojmë zyrtarët zgjedhorë
Pas incidenteve në veri, anëtarët e KQZ-së mbajtën një mbledhje pasditen e 6 dhjetorit.
Kryetari i Komisionit Qendror të Zgjedhjeve, Kreshnik Radoniqi, tha se incidentet në veri më 6 dhjetor, dëshmuan se qasja e KQZ-së është e kufizuar në këtë pjesë të vendit.
Ai tha se pret të shohë raportin e sigurisë për procesin zgjedhor të Policisë së Kosovës, duke shtuar se “me zor nuk mbahen zgjedhjet, në këtë formë”.
“Sot kishim planifikuar të shikojmë të vizitojmë zyrat tona, për të parë se a kemi qasje. Çfarë është evidente nga raporti dhe nga çka u pa në media është se është pak problematike të kemi qasje në zyrat tona”, tha ai.
Radoniqi shtoi se më pas raporti i policisë do t’i dërgohet edhe zyrës së presidentes, së bashku me kërkesat e KQZ-së për të ofruar siguri për zyrtarët zgjedhorë, pasi siç tha, nuk mund të rrezikojë jetën e zyrtarëve zgjedhorë.
Megjithatë, ai nuk u pajtua me anëtarët e komisionit, që kërkuan prezencë më të madhe të policisë, duke theksuar se “nëse duam të shkojmë me tërë aparatin policorë, të armatosur deri në dhëmbë, atëherë çfarë zgjedhje duam të organizojmë”.
Disa nga anëtarët e KQZ-së kërkuan që Bashkimi Evropian t'i dërgojnë vërejtje Serbisë, për siç thanë, të "tërheqë grupet" që janë veri.
Ata thanë se zgjedhjet duhet të mbahen ashtu siç janë paraparë, më 18 dhjetor, por zyrtarëve zgjedhorë duhet t'u ofrohet siguri, nga Policia e Kosovës dhe nga misioni i NATO-s në Kosovë, KFOR.
Radio Evropa e Lirë kërkoi koment nga Qeveria e Kosovës në lidhje me këto zhvillime, por, deri më tash, nuk mori përgjigje.
Osmani: Bandat kriminale synojnë destabilizimin e Kosovës
Ndërkaq, e pyetur për situatën në veri pas raportimeve për shpërthime, presidentja e Kosovës, Vjosa Osmani, tha se edhe në rastet e mëparshme, situata në këtë pjesë të shtetit përshkallëzohet, për shkak se, sipas saj, “bandat kriminale, të përkrahura politikisht dhe financiarisht nga [presidenti i Serbisë, Aleksandar] Vuçiq, kanë për qëllim përshkallëzimin e situatës, kanë për qëllim destabilizimin e tërë Kosovës”.
“Rrjedhimisht, kanë për qëllim të destabilizojnë Ballkanin Perëndimor dhe të realizojnë kështu agjendat ruso-serbe. Ne duhet të bëjmë çmos që nëpërmjet institucioneve të sigurisë të Kosovës, të vendosim rend dhe ligj në çdo cep të vendit tonë, por edhe të mbrojmë jetën e secilit qytetarë tanë pavarësisht etnisë”, tha Osmani gjatë një konference për media në Tiranë, pas samitit të mbajtur midis liderëve të Bashkimit Evropian dhe shteteve të Ballkanit Perëndimor.
Serbia akuzon Kurtin
Drejtori i Zyrës për Kosovën në Qeverinë e Serbisë, Petar Petkoviq, akuzoi kryeministrin e Kosovës, Albin Kurti, për, siç tha, "terror" ndaj serbëve.
Në një postim në Twitter, ai publikoi disa fotografi ku, siç tha, duken ambientet e Komisionit Komunal Zgjedhor na Mitrovicë të Veriut, "të shkatërruara nga forcat speciale" të Kosovës.
REL nuk e konfirmoi në mënyrë të pavarur vërtetësinë e atyre fotografive.
Përmes një komunikate për media, të publikuar më herët, Petkoviq tha se qëllim i Kurtit është që "me dhunë dhe me armë t’i rrëmbejë katër komunat në veri" dhe "në to të instalojë përfaqësues shqiptarë, përmes zgjedhjeve jolegale dhe jolegjitime".
"Të gjithën e ka kurdisur dhe ia ka bërë regjinë Albin Kurti, derisa në Tiranë po mbahet samiti BE-Ballkani Perëndimor", tha Petkoviq.
Kur ka nisur rritja e tensioneve?
Tensionet midis Kosovës dhe Serbisë janë rritur qysh në verë, kur Qeveria e Kosovës ka thënë se nuk do të lejojë më në veri makina me targa që i lëshon Serbia.
Duke kundërshtuar zbatimin e këtij plani që ka nisur më 1 nëntor, serbët e veriut kanë dhënë dorëheqje nga institucionet e Kosovës, si në nivel lokal, ashtu edhe në atë qendror.
Kosova dhe Serbia, ndërkohë, kanë arritur një marrëveshje për çështjen e targave, në bazë të së cilës, Prishtina ka pezulluar planin për riregjistrimin e makinave, ndërsa Beogradi është zotuar se nuk do të lëshojë targa të reja për serbët në veri.
Tash për tash, nuk është e qartë nëse serbët e veriut do të mund të kthehen në institucionet e Kosovës dhe nëse po, si?!
Zhvillimet e fundit vijnë në ditën kur shefi i politikës së jashtme të BE-së, Josep Borrell, konfirmoi se Prishtinës dhe Beogradit u është dorëzuar teksti i një plani për normalizimin e marrëdhënieve.
