د پاکستان له پلازمېنې اسلام اباد سره نېږدې په ترلايي کلان سیمه کې پر امام باړې په ځانمرګي برید کې لسګونه کسانو ته مرګژوبله اوښتې ده. پولیس وايي، برید د فبرورۍ پر شپږمه د شیعه ګانو د جمعې لمانځه پر مهال شوی دی. د سیمې یو اوسېدونکي مشال راډيو ته وویل چې دوه وسلوال ورغلي ول چې یو یې پر امنیتي ساتونکي ډزې وکړې او بل بیا په امام بارګاه کې چاودنه وکړه. د حملې ذمه واري لا چا نه ده منلې. د پاکستان وزیراعظم د کورنیو چارو وزارت ته د پېښې د پلټنو او پکې د ککړو کسانو د قانون منګولو ته د سپارلو غوښتنه کړې ده. تر پېښې وروسته د سیمې شیعه ګان په ویر دي او یوشمېر کسانو له امام باړې سره نېږدې عزاداري هم وکړه. ویډيويي رپورټ.
