پاکستان: د اکتوبر له لومړۍ نېټې تر ۵۲ زرو ډېر افغان کډوال خپل هېواد ته ستانه شوي
پاکستان د اکتوبر په پیل کې خبرداری ورکړ چې یومیلیون او څه باندې اووه لکه هغه افغانان چې په پاکستان کې د استوګنې قانوني اسناد نه لري، که چېرته د نومبر تر لومړۍ نېټې له پاکستانه ونه وځي په زوره به یې وباسي.
د پاکستان د دې پریکړې په تړاو پرون د طالبانو د رییس الوزرا اداري مرستیال عبدالسلام حنفي په کابل کې د پاکستان له سفیر عبیدالرحمان نظاماني سره د کتنې پرمهال وویل چې اسلام اباد دې دا پریکړه بدله کړي، ځکه د هغه په وینا داسې پریکړې د دواړو ملتونو ترمنځ د فاصلو د ایجادیدو سبب کیږي.
تر دې مخکې هم طالبانو او د بشري حقونو یوشمېر ادارو له پاکستانه غوښتي وو چې افغان کډوال دې په زوره له خپلې خاورې نه باسي.