طالبانو له ايراني چارواکو سره پر سرحدي همکاريو خبرې کړي

طالبان وايي، د دوی د لوی درستیز مرستیال حاجي مالي خان صادق پرون په کابل کې د ایران له ځینو چارواکو سره پر سرحدي همکاریو خبرې وکړې.


طالبانو ته نږدې سرچینو ویلي چې په دې کتنه کې د ګډو سرحدي همکاریو د پیاوړتیا پر لارو چارو خبرې وشوې.


دا کتنه داسې وخت کېږي چې د هلمند له سینده د اوبو د حق پر سر د ایران د لوړ پوړو چارواکو او طالبانو ترمنځ لفظي شخړې زیاتې شوې دي.


ایرانی لوري ویلي، که طالبان د هلمند له سیند نه د اوبو پوره حق ورنه‌کړي، دا کار به یې ناوړه عواقب ولري، خو د طالبانو حکومت د پنجشنبې په ورځ په يوې اعلاميه کې د هلمند له سينده د ايران د حقابې په تړاو د ايران ولسمشر او د هغه هېواد د نورو چارواکو څرګندونې نامناسبې وبللې.