د افغانستان د خپلواکۍ جبهه: طالبانو يو شمېر ولايتونو کې ملکيان وهلي او بنديان کړي دي
دې جبهې دا خبره نن په یوه اعلامیه کې کړې ده.
د سیمې ځینو سرچینو هم ازادي راډیو ته تایید کړې چې د طالبانو ځواکونو یو شمېر کورونه تلاشي کړي او ځينې خلک يې نيولي دي.
د خپلواکۍ د جبهې په اعلامیه کې همدارنګه راغلي چې، طالبانو د جنوبي سالنګ د څو ورځې مخکې جګړې پر مهال د جبهې د وژل شویو جنګیالیو د جنازې په مراسمو کې د خلکو د ګډون مخه نیولې او وهلي یې دي.
د سهشنبې په ورځ د افغانستان د خپلواکۍ جبهې تایید کړه چې، د دوی ۶ جنګیالي په جنوبي سالنګ کې له طالبانو سره په سختو نښتو کې وژل شوي.
د طالبانو دفاع وزارت بیا ادعا کړې وه چې د جبهې د دوو قومندانانو اکمل امیر او بصیر اندرابي په شمول یې ۸ کسان وژلي دي.
خپلواکۍ جبهې په خپله لومړۍ اعلامیه کې ویلي وو، د جنرال اکمل امیر وژنه نهشي تاییدولی.
نن یې په دویمه اعلامیه کې هم د اکمل امیر په اړه څه نهدي ویلي، خو د طالبانو ضد بلې جبهې «ملي مقاومت جبهې» مشر احمد مسعود او ځینو نورو طالب ضد څېرو د اکمل امیر پر وژنې خواشیني ښودلې.
د طالبانو پر ضد څو جبهې جنګ کوي، چې له ډلې یې د امریکا د جنګ او سولې د مطالعاتو د انستیتوت په خبره د افغانستان خپلواکۍ جبهه په زیاتو سیمو کې فعاله ده.
د دې جبهې مشري د افغانستان د جمهوري نظام پر مهال د دفاع پخوانی وزیر او لوی درستیز جنرال یاسین ضیا کوي.