ټېسټ کرکټ سیالۍ؛ پاکستان د نیوزیلنډ او اسټرالیا د افریقا کوربتوب کوي
پاکستان پچه ګټلې او توپ وهنه کوي.
پاکستاني لوبډلمشر بابراعظم یو وار بیا سلیزه جوړه کړې ده او له پخواني لوبډلمشر سرفراز احمد سره یې ۱۹۶ منډې ملګرتیا وکړه.
د بابراعظم ریکارډ او لاسته راړونې
د یوه پاکستاني توپ وهونکي په توګه بابراعظم په ۲۰۲۲ کال کې تر دې دمه ۲۴۷۷ منډې جوړې کړې او تر ټولو پاکستاني توپ وهونکو مخکې شو.
دغه ریکارډ پخوا له محمدیوسف سره و چې په ۲۰۰۶ زېږدیز کال کې یې ۲۴۳۵ منډې کړې وې.
همدارنګه یې په یوه کال کې د ډېرو نیمه سلیزو جوړولو ویاړ هم پخپل نوم کړ.
نوموړي تر دې دمه په یوه کال کې ۲۵ ځله نیمه سلیزې وهلي دي او دا ریکارډ مخکې له ریکي پواینټینګ سره و چې په ۲۰۰۵ کال کې یې ۲۴ نیمه سلیزې وهلې وې.
د غوراوي کمېټې د مشر په توګه د شاهد افريدي ټاکنه او د سرفراز احمد بېرته راتګ
پاکستان د خپل کرکټ بورډ له مشرۍ رمیز راجا لرې او پرځای یې نجم سیټي راوست.
کله چې سيټي د کرکټ مشري پیل کړه هغه د غوراوي کمېټې یوه لنډ مهالې ډلګۍ وټاکله چې مشري یې پخواني کرکټ شاهد افریدي ته ورکړه او په کمېټه کې ورسره عبدالرزاق، هارون رشید او افتخاراحمد وټاکل شول.
افریدي په خپل لومړني کار کې درې لوبغاړي میرحمزه، ساجدخان او شهنواز دهاني د نیوزیلنډ پر وړاندې د ټېسټ سیالیو په نوملړ کې زیات کړل، چې میرحمزه په ننۍ لوبه کې هم شامل دی.
په ټولنیزو رسنیو کې وروستیو خبرونو ویلي دي چې د پاکستان د ټېسټ سیالیو مرستیال لوبډلمشر محمد رضوان هم ښايي د افريدي له لوري له سیالیو کېنول شوی وي او پر ځای یې سرفراز احمد غوره شوی دی.
محمد رضوان په څو ورستیو ټېسټ سیالیو کې د پام وړ لوبې ونه کړې او پاکستان د انګلستان پر وړاندې د ټېسټ لوبلړۍ ۳ـ۰ وبایلله.
۳۵ کلن ویکټ کيپر توپ وهونکی سرفراز خپله وروستۍ ټېسټ لوبه د ۲۰۱۹ کال په جنورۍ میاشت کې له سویلي افریقې سره کړې وه او د لوبډلمشر په توګه یې په یوه پاڼۍ کې ۵۰ منډې کړې وې او په دویمه کې په صفر سوځېدلی و.
هغه تر اوږد انتظار وروسته راستون شو او نیمه سلیزه یې جوړه کړه چې تر دې دمه نا سوځېدلی ولاړ دی.
بل لورته د سویلي افریقا او کوربه اسټرالیا ترمنځ دویمه ټېسټ سيالي تېره شپه پیل شوې ده چې افریقا په خپله لومړۍ پاڼۍ کې ۱۸۹ منډې وکړې او اسټرالیا تر دې دمه بیا د خپلې لومړۍ پاڼۍ پيل ښه کړی دی.
اسټرالیا په لومړۍ ټېسټ لوبه کې سویلي افریقا ته یوازې په دوو ورځو کې ماتې ورکړې وه او د کرکټ اکثرو لوبغاړو د ګابا لوبغالي په ویشتنځای نیوکې وکړې او هغه یې د ټېسټ لوبو لپاره نامناسب یاد کړ.
د یادونې ده چې اسټرالیا تر دې دمه د ټېسټ اتلولۍ د لوبو په درجه بندۍ کې لومړی مقام او سویلي افریقا درېیم مقام لري.