ملګري ملتونه: طالبان دې د نجونو د پوهنتونونو ځنډېدو پرېکړه بېرته واخلي
په کابل کې د دغه سازمان مرستندوی ماموریت یوناما نن په یوه خبرپاڼه کې ویلي چې دغې پرېکړې میلیونونه افغانان او نړیواله ټولنه غصه کړې ده.
یوناما په خپله اعلامیه کې ویلي: "په پوهنتون کې د ښځو د حضور مخنیوی د طالبانو لخوا د ښځو پر وړاندې د هدفي تبعیض د سیستماتیک سیاست دوام دی."
طالبانو تراوسه د ملګروملتونو پر دغې اندېښنې تبصره نه ده کړې.
د طالبانو د حکومت د لوړو زده کړو وزارت پرون یو فرمان ورکړ چې له مخې یې د نجونو لوړې زده کړې تر دویم اعلان پورې وځنډېدې.
طالبانو چې له بیا واکمنۍ یې نژدې یو نیم کال تېرېږي، تر دې وړاندې له شپږم ټولګي پورته د نجونو ښونځي هم بند کړي او دویم اعلان ته یې منتظر کړي دي.