د فوټبال نړیوال جام؛ مراکش او فرانسه په نیمه پایلوبه کې لوبېږي
که څه هم پرتګال په دې لوبه کې اویا سلنه برلاسې وه، خو د مراکش لپاره یوسف نصیري د لوبې په ۴۲ دقیقه کې ګول ترسره کړ.
د پرتګال مشهور ستوری کرسټیانو رونالډو چې د لوبې په لومړنیو شېبو کې نه و، خو د ګول له خوړلو وروسته د لوبې ډګر ته راغی او پرله پسې بریدونو یې هم کومه مثبته پایله ورنه کړه.
د مراکش ګول ساتونکی یو وار بیا د دې لوبې ستوری و.
مراکش نیمه پایلوبې ته ووت او پرتګال له دې نړیوال جام څخه بهر شو.
په دویم کوارټرفاینل کې بیا د فوټبال څارونکو له اټکل سره سم فرانسې ۲ـ۱ د انګلستان پیاوړې لوبډله له نړیوال جام رخصت کړه.
دغه دواړه هېوادونه چې له غوره کورنيو فوټبال لیګونو برخمنې دي سيالۍ یې په نړیواله کچه پرېمانه ليدونکي لري.
فرانسې د لوبې په ۱۷ دقیقه ګول وواهه، خو د انګلستان پیاوړي لوبغاړي هري کین بیا د لوبې په ۵۴ دقیقه کې لوبه ۱ـ۱ برابره کړه.
فرانسې په ۷۸ دقیقه کې دویم ګول هم ترسره کړ او بیا یې تر پایه د انګریزانو د بريدونو ښه دفاع وکړه او په دې سره یې د څلورمې لوبډلې په توګه نیمه پایلوبې ته لار پيدا کړه.
مراکش او فرانسه به د ډسمبر میاشتې په څوارلسمه نېټه نیمه پایلوبه ترسره کوي.
باید وویل شي چې کرویشیا او ارجنټاین هم نیمه پایلوبې ته وتلي دي او د ډسمبر میاشتې په ۱۳ نيټه به پایلوبه لوبوي.
د فوټبال نړیوال جام سيالیو پایلوبه د ډسمبر په اتلسمه نېټه ترسره کېږي.