زلنسکي: د اوکراين په ختيځ کې د روسيې په بريد کې لس کسان وژل شوي
زلنسکي تېره شپه په لنډه ویډیویي وینا کې دا برید ډېر وحشیانه او بشپړ سنجول شوی وباله چې د ده په خبره په یوه مارکېټ، د غَلو د پورته کولو په یوه لفت، د تېلو په یوه ټانک، په یوه بس تم ځای او د هستوګنې په یوه ودانۍ کې یې سولهییز کسان، عادي وګړي ووژل.
زلنسکې زیاته کړه چې تر اوسه د وژل شویو شمېر لس تنه دی او ډېر کسان ټپیان شوي دي.
د اوکراین د ولسمشرۍ د ادارې مرستیال کیرولو تیموشینکو وویل، روسي ځواکونو پر کوراخووا څو توغندویي بریدونه کړي دي.
دا ښارپه دونیڅک سیمه کې د جګړو یو اصلي ډګر و.
هغه همدا راز وویل چې، د خارکییف د سیمې پریوه ښارګوټي روسي ځواکونو توغندویي بریدونه کړي چې د ده په وینا دوه یې د اوکراین د هوايي مدافعې ضد ځواکونو راغورځولي دي.
په دغو بریدونو کې د چارواکو په خبره چا ته زیان نهدی رسېدلی.
په عین حال کې د اوکراین د برښنا د شبکې اوکرینرهو مشر ولادمیرکودریتسکي د بیارغونې او پراختیا لپاره د اروپایي بانک لهخوا جوړې شوې یوه غونډې ته وویل چې، روسي ځواکونو پر اوکراین د یرغل له پیل راهیسې د دې هېواد د برښنا پر تاسیساتو د توغندویو او میزایلو څه باندې زر حملې کړي خو له دې سره سره دا شبکه تر اوسه فعاله ده.
هغه وویل چې، چارواکو یې د شبکې د ترمیم لپاره د اړتیا وړ وسایلو لپاره نړیوال لټون پیل کړی دی.
د اوکراین پر حیاتي تاسیساتو د روسیې د هوايي حملو په وروستیو اتو څپو کې د دې هېواد د برښنا شبکې ته سخت زیان رسېدلی چې په نتیجه کې یې په ټول هېواد کې برښنا په موقتي او پلان شوې توګه پارچاو شوې ده.
د کودریتسکي له قوله ویل شوي چې وایي، دا بریدونه د برښنا شبکې ته تر ټولو لوی ګوزار دی چې بشریت تر اوسه نهدی لیدلی خو له دې سره سره، سیسټم لا هم کار کوي.
په عین حال کې د روسيې ولسمشر ولادمير پوتين وايي، دا نه ردوي چې په اوکراين کې به جګړه په يوه "اوږده بهير" بدله شي، په داسې حال کې چې د اوکراين ولسمشر ولادمير زلنسکي وايي، اوکراين به خپل هيڅ تبعه د روسيې تر اشغال لاندې ته پرېنږدي.