طالبان په نورستان او کونړ کې د لګېدلي اور مهارولو ادعا کوي خو خلک يې ردوي
د نورستان د نورګرام د شامه درې او کونړ ولایت د چپې درې ولسوالۍ د ځنګلونو د اورلګېدنې د ختمېدو په اړه ضد او نقیض خبرې او د لغمان ولایت الیشینګ والسوالۍ ته یې د خپرېدو په اړه اندېښنې!
که څه هم په دغو ولایتونو کې ځایي اوسېدونکي وايي، اور نه دی مړ، خو د طالبانو د حکومت اړوند مرکزي او سیمه ییز چارواکي ډاډ ورکوي، چې دا اور مهار شوی دي.
طبیعي پېښو ته د طالبانو د حکومت د رسېدنې وزارت مرستیال شرف الدین مسلم رسنیو ته په لېږلي تازه غږیز پیغام کې ډاډ ورکړی، چې په دغو دواړو ولایتونو کې په ځنګلونو کې لګېدلی اور اوس مړ شوی دی.
هغه وویل: "لله الحمد اورونه د ولسونو او ځایي مسوولینو په همکارۍ ختم او په بشپړ ډول دفع شوی دی."
خو د نورستان د نورګرام ولسوالۍ اوسېدونکی بشیر احمد احمدي ازادي راډیو ته وویل، چې تر دې دمه د دې ولایت د ځنګلونو اور نه دی مهار شوی.
هغه زیاته کړه: "تر اوسه پورې اور کنټرول شوی نه دی، اور لګېدنه دوام لري، تر دې دمه نورستان ته کومه مرسته نه ده رسېدلې، اوس انګار دی د موسمي بادونو له وجې دا اور په زیاتېدو دی، خلک هڅه کوي چې دا اور مهار او له منځه یې یوسي."
د دې ولسوالۍ یو بل اوسېدونکي عبدالوهاب ازادي راډیو ته وویل، چې اور لګېدنې د خلکو ټولې اقتصادې عایداتي سرچینې له منځه یووړې.
هغه وايي: "همدا ځنګلونه د خلکو لپاره ښه عایداتي منابع وې ځکه جلغوزي او مرخېړي په کې و او خلکو به له همدې درکه خپل د ژوند اقتصاد مخته ووړ، خو اور ټړل له منځه یوړل."
د نورستان ولایت لپاره د طالبانو د حکومت د اطلاعاتو او کلتور مشر سمیع الحق نورستاني بیا ازادي راډیو ته وویل، چې اور ختم نه بلکې یوازې کنټرول شوی دی.
بلخوا په کونړ ولایت کې د چپې درې ځینې اوسېدونکي وایي، که څه هم مخکې د دې ولسوالۍ په ځنګلونو کې اور مهار شوی و خو اوس د بادونو له امله بېرته زیات شوي دي.
د دې ولسوالۍ اوسېدونکي حسین شاه جلالي ازادي راډیو ته وویل: "ځنګلونو اور اخیستی او لا هم دوام لري، یو ځل اور مهار شوی وه خو اوس بېرته د بادونو له وجې زیات شوی."
د نورستان نور ګرام شامه دره ځنګلونو کېله تېرو لسو ورځو او کونړ ولایت چپې درې ځنګلونو کې له تېرو درېیو ورځو راپدېخوا اور بل شوی چې د ځایي چارواکو په خبره تر اوسه په کې شاوخوا ۱۷ سوه جریبه ځمکه او ځنګلونه سوځېدلي دي.
د لغمان ولایت د الیشینګ ولسوالي ځینو اوسېدونکو ازادي راډیو سره خبرو کې اندېښنې ښودلې، که دا اورونه ختم نه کړل شي دغه ولایت ته به هم ورسېږي.