په اوکراین کې جګړې افغانستان کې د خوړو او سونګ موادو بیې 'لوړې' کړي
دا پروګرام وايي په داسې حال کې چې اروپا د روسیې له برید وروسته د څه باندې ۳ ملیونه اوکرایني کډوالو له ستونزې سره مخامخ ده، نړیواله ټولنه باید د افغانستان په برخه کې نور اقدامات هم وکړي.
طالبان په تېر اګسټ کې په افغانستان کې واکمن شول او د ملګرو ملتونو دې اړوندې ادارې له هغه راهیسې ویلي دي چې په سلو کې ۹۵ افغانان کافي خواړه یا د خوراکي موادو د پېرلو لپاره د اړتیا وړ پیسې نهلري.
د خوړو د نړیوال پروګرام ویاندې شیلي ټکرال پرون خبریالانو ته وویل چې په افغانستان کې هسې هم په تېرو اتو میاشتو کې د خوراکي موادو بیې په سلو کې ۴۰ لوړې شوې وې، خو پر اوکراین د روسیې له یرغل وروسته نور زیاتوالی هم پهکې راغی.
دا زیاتوي: "وېروونکې خبره دا ده چې په افغانستان او د نړۍ په ټولو بېوزلو هېوادونو کې د خوړو او د سونګ موادو بیې داسې مهال لوړې شوي چې د ملګرو ملتونو د ارقامو له مخې د سږني کال په فبرورۍ کې هسې هم بیې لوړې وې او فکر کوم په داسې حال کې چې د اوکراین پر جګړې ورځې او اوونۍ اوړي دا هغه خبره ده چې موږ باید څارنه پرې وکړو."
په تېرو نږدې اتو میاشتو کې «ډبلیو اېف پي» افغانانو ته د خوړو د برابرولو پر هڅو یو میلیارد ډالر لګولي، خو وايي نورو ۱،۶ میلیارده ډالرو ته اړتیا لري.
مېرمن ټکرال وايي مرستندویو هېوادونو افغانستان ته شا نهده اړولې، خو د دې په وینا په داسې حال کې چې اروپا پر اوکراین د روسیې له برید وروسته د څه باندې درې ملیونه اوکرایني کډوالو له ستونزې سره لاس او ګرېوان ده نړیواله ټولنه باید د افغانستان په برخه کې یو څه نور اقدامات وکړي.
د مېرمن ټکرال له بېګانیو څرګندونو مخکې د کډوالو لپاره د ملګرو ملتونو لوی کمېشنر فیلیپو ګراندې د سې شنبې په ورځ کابل ته د سفر پر مهال خبرداری ورکړ چې ښايي د اوکراین جګړه د افغانستان او د نړۍ د نورو برخو له بشري بحرانونو څخه د مرستو پیسې بلې خوا ته کړي.
د «ډبلیو اېف پي» ویاندې وویل په داسې حال کې چې افغانستان ته غنم له قزاقستان او ازبکستان څخه واردېږي د اوکراین د جګړې له کبله د خوړو او سونګ موادو د بیو لوړېدل ښايي د بشري مرستو لګښتونه هم ۲۰ سلنه زیات کړي.