د لتا منګېشکر مړینه؛ پخوانیو افغان چارواکو او عامو افغانانو خواشیني څرګنده کړې
پخواني جمهور رئیس حامد کرزي په خپله ټویټر پاڼه د لتا مړینه ضایع بللې او کورنۍ ته یې د تسلیت مراتب وړاندې کړي دي.
ښاغلي کرزي لیکلي د لتا منګېشکر غږ ملیونونه زړونه له خوښیو ډک کړل.
د افغانستان د بهرنیو چارو پخواني وزیر محمد حنیف اتمر په خپله ټویټر پاڼه لیکلي:"موږ د خپل مخکې نسل په شان د لتا منګېشکر له ښکلي غږ او سندرو سره رالوی شوي یو او ژوند مو کړی، هغه به زموږ د ژوند برخه او د ګډ تمدن میراث وي.”
د هند د موسیقۍ اسطوره لتا منګېشکر پرون یکشنبه د 'کووېډ-۱۹' ناروغۍ له امله د ۹۲ کلنۍ په عمر وفات شوه.
د لتا منګېشکر په مړینې د هند حکومت دوه ورځېنی ویر اعلان کړی.
د هند حکومت د لتا منګېشکر مړینه د خپل هېواد او هنر نړۍ لپاره یوه لویه ضایعه بللې ده.
که څه هم لتا واده و نه کړ او نه اولاد لري، خو د هندي موسیقۍ مور شوه.
په افغانستان کې د ټولنیزو رسنیو یو شمېر کارکوونکو لیکلي چې د لتا منګېشکر غږ او سندرې به د خلکو په ذهنونو کې تل پاتې وي .
د کابل اوسېدونکې ٢٧ کلنه بنفشه بهار وايي چې د مېرمن لتا مينه واله ده.
بنفشه وایي:" په ډېر افسوس او درد سره هند خپل یو ځانګړې سندرغاړې له لاسه ورکړه. ما د ماشومتوب راهیسې د دې هندي افسانوي سندرغاړې سندرې اورېدلې. د سندرو په اورېدلو یې ما ته عجیب احساس پیدا کېدو. په دې وروستیو کې زه د هغې یوه حماسي سندرې سره مخ شوم (بنام هی میرا وطن کی لوګو) د دې سندرې موسیقۍ، شعر او تصویر په معجزه یې توګه د هر انسان په زړه کې د وطن پالنې احساس راپاروي".
په نوي ډهلي کې افغان شاعر او لیکوال د یاسېنګ انجان هم وايي، د لتا د غږ مینوال و او هغه یې ډېره اورېدلې.
د لتا منګېشکر په اړه ویل کېږي چې مینه ناکه او هڅوونکې هم وه.
افغان پېژندل شوې سندغاړې مېرمن قمرګل، کلونه مخکې ازادي راډیو سره په مرکه کې ویلي و لتا منګېشکر به دا افغانۍ لتا بلله او په بېلابېلو مناسبتونو کې به یې ورته د مبارکۍ کارتونه لېږل.
لتا منګېشکر خپله لومړنۍ سندره شااوخوا ۷۳ کاله وړاندې په ۱۹۴۹ کال کې وویله.
لتا په خپل ژوند کې یوازینۍ هندي سندرغاړې پاتې شوه چې د اوو لسیزو لپاره فعاله وه او د څلورو نسلونو لپاره یې سندرې ویلې.
د تورو او سپینو فلمونو رانیولې بیا د بالیووډ سینما د شهرت تر پړاوه پورې.
لتا له ۷۰ کاله په زیات سندریز ژوند کې له ۳۰ زرو څخه زیاتې سندرې ویلې دي.
په نوي ډهلي کې افغان شاعر او لیکوال د یاسېنګ انجان هم وايي، د لتا د غږ مینوال و او هغه یې ډېره اورېدلې.