د لویدیځ ډپلوماټان وایي، د ایران د اټمي تړون د ژغورلو خبرې وروستي پړاو ته نژدې شوي دي.
ډپلوماټانو په لنډو دا خبره د ایران او د نړۍ د سترو ځواکمنو ترمنځ له یوې اوونۍ خبرو وروسته، وکړه.
د جرمني، بریتانیا او فرانسې ډپلوماټان د روسیې او چین له ډپلوماټانو سره له تیر پسرلي راپه دې خوا د اترېش په پلازمېنه ویانا کې هڅې کوي چې واشنګټن او تهران د دوه زره پنځلسم کال اټمي تړون ته سره نژدې کړي.
د اروپایي ټولنې استازې انریک مورا وویل، د خبرو برخه وال د سلامشورې لپاره خپلو هېوادونو ته تللي دي او دا اوونۍ به بېرته د خبرو میز ته سره کیني.
د جرمني، بریتانیا او فرانسې ډپلوماټانو په ګډ بیان کې ویلي دي چې خبرې وروستي پړاو ته رسیدلي دي او اوس یوازې سیاسي پریکړې ته اړتیا ده.
