بایډن پوتین ته: د اوکراین سرحد ته د روسيې هر راز پوځي حرکت به 'یرغل' وګڼل شي
ښاغلي بایډن زیاته کړه چې ولسمشر پوتین ته د ده خبرې واضحې وې: "ما له ولسمشر پوتین سره سپینې خبرې وکړې. هغه په دې پوهېږي چې که د روسیې هر ډول تجهیز شوې قطعې د اوکراین د پولې خوا ته وخوځېږي یرغل به وګڼل شي او سختو او منظمو اقتصادي اقداماتو به ځواب ورکړل شي. په دې اړه مو له خپلو متحدانو سره خبرې کړي او ولسمشر پوتین ته مو هم پوره وضاحت ورکړی دی، خو په دې کې شک نه شته چې که پوتین دا غوره وګڼي نو روسیه به ډېر سخت تاوان وګالي."
بایډن دا خبرداری وروسته له هغه ورکوي چې د بهرنیو چارو وزیر یې د امریکا له اروپايي متحدانو سره په برلین کې د اوکراین پر بحران خبرې وکړې.
انتوني بلېنکن پرون د جرمني، فرانسې او بریتانیا د بهرنیو چارو له وزیرانو سره تر خبرو وروسته خبریالانو ته وویل چې مسکو له ناوړه عواقبو سره مخامخ دی او که پر اوکراین برید وکړي نو د امریکا او د امریکا د متحدانو او شریکانو له چټک او سخت غبرګون سره به مخامخ شي.
له بلېنکن سره په ګډه خبري غونډه کې د جرمني د بهرنیو چارو وزیرې انالېنا بایربوک وویل، څلور واړو وزیرانو پر روسیې غږ وکړ چې د کړکېچ د اوارۍ لپاره ګامونه واخلي.
مېرمن بایربوک زیاته کړه، هر راز تاوتریخجن دریځ او نور یرغل به خورا ناوړه عواقب ولري.
ټاکل شوې چې بلېنکن به د امریکا له متحدانو سره تر خبرو وروسته جنیوا ته ولاړ شي او د روسیې د بهرنیو چارو له وزیر سرګي لاوروف سره به وګوري.
له بلې خوا د ناټو عمومي منشي ینس سټولټنبرګ د روسیې پر وړاندې د دې ټلوالې د غړو ترمنځ د یووالي پر اړتیا ټینګار کړی.
ښاغلي سټولټنبرګ پرون له CNN ټلوېزیون سره په مرکه کې وویل، د ناټو ټولو غړو هېوادونو څو ځلي دا خبره په ډاګه کړې چې که روسیه پر اوکراین برید وکړي نو ځواب به ورکړي.
په لویدیځو هېوادونو کې له څو ورځو راهیسې پر اوکراین د روسیې د احتمالي یرغل په اړه د خطر زنګونه کړنکېږي.
په دې برخه کې اندېښنې وروسته له هغه زیاتې شوې چې روسیې شااوخوا ۱۲۷ زره سرتېري د اوکراین د سرحد په اوږدو کې ځای پرځای کړل او بېلاروس ته یې د پام وړ پوځي ځواک واستاوه. مسکو او مینسک وايي دا سرتېري د ګډو پوځي تطبیقاتو لپاره هلته استول شوي دي.