د ایران ولسمشر ابراهیم رییسي ژمنه کړې، ایران به تر هغو چې د امریکا پخوانی ولسمشر ډونالډ ټرمپ او د دې هېواد د بهرنیو چارو پخوانی وزیر مایک پومپیو محاکمه شوې نه وي، د ستر جنرال قاسم سلیماني د وژلو غچ به واخلي.
سلیماني دوه کاله مخکې د بغداد په هوایي ډګر کې د امریکا د بې پیلوټه الوتکې په برید کې ووژل شو.
رییسي پرون دوشنبه(د مرغومي ۱۳مه) په یوه ټلوېزیونې وینا کې وویل، تر هغو چې ټرمپ او پومپیو د جنرال سلیماني د وژلو لپاره د ده په وینا د دغه جنایت په خاطر په عدلي محکمه کې نه وي محاکمه شوي، مسلمانان به یې غچ واخلي.
د سلیماني د وژلو د دوهم کال په پوره کېدو سره سیمه ییز کړکېچ ډېر زیات شوی دی.
پرون د ورځې په لومړیو کې امنیتي سرچینو وویل چې دوه پوځي بې پیلوټه الوتکې چې د بغداد نړیوال هوایي ډګر کې د امریکایي ځواکونو پوځي تاسیساتو ته نژدې شوې وې، را وغورځول شوې.
په دې پېښه کې چې عراقي امنیتي چارواکو هم تایید کړې، د ځاني او مالي زیانونو راپور نه دی ورکړل شوی.
سلیماني چې د ایران د سپاه پاسداران انقلاب د قدس ځواکونو قوماندان و، له خپل عراقي مرستیال ابو حمید ال موهندس سره یوځای د ۲۰۲۰ زیږدیز کال د جنورۍ په درېیمه ووژل شو.
دغې حملې ته د امریکا پخواني ولسمشر ډونالډ ټرمپ امر ورکړی و.
