افغانستان سره د وارداتي برېښنا موافقه یو کال نوره هم تمدید شوه
د دې شرکت ویاند حکمت الله میوندي وايي: "له ازبیکستان، ترکمنستان، ایران او تاجکستان سره چې موږ ورڅخه وارداتي برېښنا واردوو، د ۲۰۲۲م زیږدیز کال تر پایه پورې د وارداتي برېښنا موافقه لاسلیک شوې ده."
د ښاغلي میوندي په وینا د لاسلیک شوېو تړونونو ټول ارزښت ۲۶۰ میلیونه ډالره دی او د دغو موافقو په نتیجه کې ترلاسه شوې برېښنا به پر ۲۶ ولایتونو ووېشل شي.
د برېښنا شرکت اوس مهال د طالبانو په واک کې دی.
افغانستان د خپلې اړتیا ۷۰ سلنه برېښنا له ګاونډیو هېوادونو واردوي.
مخکې د دې شرکت سرپرست صفی الله احمدزي ازادي راډیو ته ویلي و چې برېښنا شرکت د وارداتو په برخه کې شااوخوا ۶۲ میلیونه ډالره پوروړی دی او د بانکي وضعیت په ښه کېدو سره به دا پور بېرته پرې شي.