په جلالاباد ښار کې هدفي او مرموزو وژنو او ناامنیو د خلکو اندېښنې راپارولې دي.
د ننګرهار خلک له طالبانو غواړي چې په ښار او ولسوالیو کې دې د خلکو د امنیت د خوندیتوب لپاره ځانګړي تدابیر ونیسي.
دا په داسې حال کې ده چې نن سې شنبه «۱۴۰۰ کال د تلې ۲۰» هم غرمه شااوخوا ۱۲ بجې د جلالاباد ښار د ۴مې ناحیې اړوند چهل مترې سیمه کې د ناپېژانده وسلهوالو لهخوا یو ځایي مخکښ مدني فعال عبدالرحمن معاون په ډزو ووژل شو.
د عبدالرحمن معاون ورور شاد نور مظلومیار وایي، ورور یې نن د یوه واده په مراسمو کې د ګډون په هدف له کوره وتی و چې په لاره کې ورته وسلهوالو کمین نیولی و او ویېواژه.
شاد نور زیاتوي، دوی له هېڅ کوم چا سره شخصي دښمني نهلري او د ورور وژل یې د ده د رښتینو مدني فعالیتونو له امله و.
شاد نور زیاتوي: "کوم چا سره شخصي دښمني نهلرو، څلورمه ناحیه کې یې د واده په مراسمو کې ګډون درلود، هلته د نامعلومو کسانو لهخوا په شهادت رسېدلی دی، له موجوده نظام او حکومت نه مو غوښتنه دا ده چې مجرمینیې ونیسي او د نورو هېوادوالو امنیت دې ونیسي او ترڅنګ دې یې د دغسې فعالو او وطندوستو خلکو امنیت ته ځانګړې پاملرنه وکړي او باید مجرمین محکمې ته کش کړي."
د ننګرهار په مرکز جلالاباد او ځينو لیرې پرتو سیمو او ولسوالیو کې د طالبانو له واکمنېدو راهیسې د چاودنو، وسلهوالو بریدونو، هدفي او مرموزو وژنو او د ناامنۍ لسګونه پېښې شوي چې د ملکیانو په ګډون لسګونه کسانو ته پهکې مرګژوبله اوښتې ده.
د ننګرهار اوسېدونکی ابراهیم وایي، د طالبانو په راتګ سرهیې د امن هیله لرله، خو په خبرهیې، اوس چې د ناامنیو له پېښو خبرېږي، نو نهیلی کېږي او اندېښنې یې زیاتېږي.
دی وايي: "والله اندېښنې خو له مخکې هم وې، حکومت یو دم سقوط وکړ، خلک بېروزګاره شول او کاروبار ورک شو، خو بیا هم د خلکو هیله وه چې طالبان راغلل امنیت به ټینګ کړي، خو اوس د داعش اندېښنې راپیدا شوي نو دا اندېښنې دې هم خدای پاک ورکې کړي."
ننګرهاریان اندېښمن دي او وایي، له څه مودې راهیسې په دغه ولایت کې نسبي کراري او امن ټينګ و، خو په دې وروستیو کې نږدې هره ورځ د مرګ او وژنو یوه پېښه کېږي چې باید مخهیې ونیول شي.
د جلالاباد ښار یو بل اوسېدونکی اغا جان وایي، د ځینو وسلهوالو ډلو فعالیت او بریدونو ښاریان اندېښمن کړي، دی له طالبانو غوښتنه کوي چې په ښار او ولسوالیو کې دې د ولسي خلکو د ژوند خوندیتوب ته ځانګړې پاملرنه وکړي.
اغا جان ازادي راډیو ته وویل: "ناامني خو سمه ډېره شوې ده، پهکار ده چې موجوده حکومت ورته یو منظم پلان جوړ کړي، مشخص پلانونه ورته تنظیم کړي، هر څه ژر باید د مخنیوي لپارهیې کار وکړي."
تر اوسه معلومه نهده چې په ننګرهار کې د ناامنیو د وروستیو پېښو تر شا د چا او کومې ډلې لاسونه دي، خو د یادونې وړ ده چې په دې وروستیو کې پر طالبانو او د دوی په موټرو د ځینو بریدونو مسؤلیت داعش ډلې منلی او پهکې له ۳۰ زیاتو طالبانو ته د مرګژوبلې اړولو ادعا یې کړې ده.
خو د ننګرهار ځایي امنیتي مسؤلان بیا خبریالانو ته د پېښو د جزئیاتو له ورکولو ډډه کوي او ډېر کله ترې ناخبري ښيي.
شااوخوا درې اوونۍ وړاندې د اطلاعاتو او فرهنګ وزارت معین او د طالبانو ویاند ذبیحالله مجاهد دغو اندېښنو ته په کتو په کابل کې یوه خبري کنفرانس کې خلکو ته د امنیت د خوندیتوب ډاډ ورکړ او ویېویل چې داعش ډلهیې ځپلې او د نورو بریدونو وس به ونهلري.
خو ننګرهاریان له طالبانو غوښتنه کوي چې د امنیت خوندیتوب او د هدفي وژنو د مخنیوي لپاره دې شته حکومت امنیتي بنسټونه غښتلي او په امنیتي ادارو کې دې مسلکي کسان په دندو وګماري.
خلک اندېښنه لري او وایي، که د امنیت د ټينګښت غم ونهخوړل شي، نو لویې امنیتي ننګونې به رامنځته شي.
