د اروپا د ملتونو جام د فوټبال د نن شپې په سیالیو کې چک جمهوریت د ډنمارک او انګلستان د اوکراین پر وړاندې د مسابقې ډګر ته وځي.
ګټونکې لوبډلې به د دې سیالیو نیمه پایلوبې ته لاره پیدا کړي.
اسپانیا او ایټالیا له وړاندې د دې سیالیو نیمه پایلوبو پړاو ته لاره کړې ده، تېره شپه اسپانیا سویزر لینډ ته ماتې ورکړه او ایټالیا بلجیم ته.
لومړۍ لوبه چې د اسپانیا او سویزرلینډ ترمنځ ترسره شوه، د یو-یو ګول په کولو مساوي پایته ورسېده، خو د پننالټي ګولونو په وهلو سره اسپانیا وتوانېده چې دغه لوبه وګټي.
د همدې سیالیو په دوهمه لوبه کې چې د ایټالیا او بلجیم ترمنځ وشوه ایټالیا وتوانېده چې ۲ د یو پر وړاندې بلجیم ته ماتې ورکړي.
د دې سیالیو لومړۍ نیمه پایلوبه به د نیمه پایلوبو پړاو به د روانې اوونۍ سې شنبې په ورځ د اسپانیا او ایټالیا ترمنځ ترسره کېږي او دوهمه نیمه پایلوبه بیا د نن شپې د دوو ګټونکو لوبډلو ترمنځ راتلونکې چهارشنبه ترسره کېږي.
د اروپا د ملتونو جام پایلوبه د جولای په ۱۱مه نېټه د انګلستان په ویمبلي سټډیوم کې ترسره کېږي.
