کونړ کې یو شمېر ځوانانو د کنډو کپر سړکونو او لارو کوڅو د جوړولو لپاره یو ټولنیز کمپاین پیل کړی دی او غواړي له دې لارې خلک د ټولګټو پروژو ساتنې ته وهڅوي.
د سړک ترمیم کوونکي رضا کارې ډلې مشر امان الله سالارزی وايي، دا کار يې ځکه پیل کړی چې څو خلک او حکومت په دې وپوهېږي چې سړک جوړول او ساتل غواړي، نو ځکه يې په خپل شخصي لګښت د سړک جوړولو ته لستوڼې بډ وهلي دي .
سالارزي زیاته کړه: "موږ دا کار د دې لپاره پیل کړی څو خلک او حکومت په دې پوه شي چې د سړکونو جوړول او ساتل د ټولو شریک کار دی او باید وساتل شي. موږ په خپلو مصارفو دا سړک رغوو، خو زموږ پر هڅو ټول سړک نه جوړیږي، حکومت دې جدي اقدام وکړي او سړک دې ترمیم کړي."
د وټه پور ولسوالۍ اوسیدونکی ذبیح الله لاروی هم وايي، سړکونه او دېته ورته د ټولګټو پروژو ساتنه د ولس او حکومت ګډه دنده ده او په وینا یې اوس چې دغو ځوانانو یې د ترمیم لپاره مټې رابډ وهلي کار يي د ستایلو دی.
لاروی زیاتوي: "دغه سړک د خلکو او حکومت د بې غورۍ له امله کنډو کپر شوی حکومت یې هم په ساتنه او بیارغونه کې پاتې راغلی او باید ترمیم یې کړي، ځکه پردې سړکونو میلیونونه ډالر لګیدلي. د دې ځوانانو پاکو احساساتو ته هم سلام کوم او له خلکو هم هیله کوم چې خپل د پټي اوبه سړک ته نه سموي."
په کونړ کې حکومتي مسوولین هم د رضاکارو ځوانانو له خوا د پيل شویو چارو ستاینه کوي او وايي، د پارون-اسعداباد سړک د ېوې برخې د اساسي ترمیم لپاره بودجه منظوره شوې او ډېر ژر به پرې کار پیل شي.
د کونړ والي محمد اقبال سعید ازادي راډیو ته وویل: "د پېچ پر سړک چې د پیچ د ولسونو او ځوانانو له خوا روان کار نیک اقدام دی. دا د مالکیت احساس دی چې د پېچ ولسونه يې لري. حکومت هم مصمم دی او په پلان کې لري چې دا سړک ورغوي. د دې سړک د جوړولو لپاره بودجه هم په نظر کې نېول شوې ده او انشاالله چې په نژدې راتلونکي کې به پرې کار پيل شي."
والي پر خلکو غږ کوي چې له دې وروسته باید د سړک په ساتنه کې حکومت سره همکاري وکړي او په وینا د خپلو کورونو او ودانیو اوبه له سړکونو وژغوري.
د پارون-اسعداباد پر سړک هره ورځ په سلګونو موټر تګ راتګ کوي چې له امله یې موټر چلوونکي، ناروغان او نورې سورلۍ ستونزو سره مخ وي.
یاد سړک شااوخوا سل کیلو متره اوږدوالی لري چې ۴۰ کیلومتره يې د نړیوالو ځواکونو له خوا له ۲۰۰۶ څخه تر ۲۰۰۹ میلادي کال پورې قیر شوی و، خو په یو شمېر ځایونو کې د ماینونو چاودېدو او اوبو له امله بېرته ډېر ژر ویجاړ شو.
د سیمې اوسیدونکي یې وايي، څو ځلي ولسونو سره حکومتي چارواکو د یاد سړک د ترمیم ژمنې وکړې، خو په وینا یې لا هم هغه شان کنډوکپر پروت دی او لا نور هم ویجاړیږي.
