افغان طالبان وايي، د افغانستان د راتلونکي نظام په اړه وروستۍ پرېکړه به په قطر کې د دواړو خواوو د مرکچي پلاوو په خبرو کې کېږي.
د طالبانو ویاند ذبیح الله مجاهد دا څرګندونې پرون ماښام (مارچ ۲۳مه) ماښام له مشال راډیو سره په خبرو کې وکړې.
د مجاهد څرګندونې د هغو راپور په غبرګون کې وې چې وايي، ولسمشر اشرف غني به د له وخته مخکې انتخاباتو مسئله د افغانستان د سولې په اړه د بحث لپاره په ترکیه کې په جوړېدونکې غونډه کې وړاندې کړي.
د ولسمشر دفتر یوه جګپوړي چارواکي چې د موضوع د حساسیت له کبله یې نه غوښتل نه نوم یې په ډاګه شي، پرون ازادي راډیو ته وویل چې ولسمشر غني به د سولې لپاره خپله وړانديز د ترکیې غونډې ته وړاندې کړي.
په دې وړانديز کې ویل شوي چې که طالبان پر اوربند موافقه وکړي نو له موافقې وروسته د شپږو میاشتو په ترڅ کې به له وخته مخکې انتخابات وشي.
خو ذبیح الله مجاهد وايي، چې د افغانستان تېرو انتخاباتي تجربو ته په پام سره به طالبان هېڅکله په داسې یوه بهیر کې برخه وانه خلي.
د ولسمشر دفتر سرچینې وویل، د ولسمشر د وړانديز له مخې به اوسنی حکومت چې اشرف غني یې مشري کوي، د سولې د حکومت په توګه خپل کار ته دوام ورکړي.
سرچینه زیاتوي چې په افغانستان کې له وخته مخکې انتخابات د ملګرو ملتونو، اروپايي ټولنې او امريکا تر څارنې لاندې ترسره کېدای شي.
سرچینې دا هم ویلي چې طالبان له انتخاباتو مخکې د یوه مېکانېزم پر اساس کولای شي د سولې په حکومت کې ګډون وکړي، وزارتونه او ریاستونه اداره کړي او جنګیالي به یې د افغان امنیتي ځواکونو په لیکو کې جذب شي.
د دې چارواکي په وینا پر دې هم بحث کېدای شي چې د طالبانو استازو ته به په پارلمان او حکومت کې په کومه کچه ونډه ورکول کېږي.
د ولسمشر دفتر دا سرچینه همدا راز وایي، د دې لپاره چې له وخته مخکې انتخاباتو کې د احتمالي درغلیو مخه ونیول شي او د طالبانو شکونه لېرې شي، ولسمشر غني او دواړه مرستیالان به یې په انتخاباتو کې ګډون ونه کړي.
سرچینه زیاتوي چې د ولسمشر دا وړانديز له امریکايي چارواکو سره هم شریک شوی څو په دې اړه سلا مشورې وکړي.
دا وړانديز داسې مهال وړاندې کېږي چې ټاکل شوې ترکیه د امریکا د غوښتنې پر اساس په نيږدې راتلونکې کې د افغانستان د سولې د خبرو کوربه وي.
ذبیح الله مجاهد وايي، د افغانستان د سولې لپاره د امریکا وړانديز د طالب مشرانو تر غور لاندې دی خو تراوسه یې په اړه وروستۍ پرېکړه نه ده شوې.
د افغانستان د سولې لپاره د امریکا ځانګړي استازي زلمي خلیلزاد هم سیمې ته د وروستي سفر په ترڅ کې د سولې یو وړانديز کړی و چې د لنډ مهاله حکومت جوړېدل یې یوه برخه وه، خو ولسمشر غني تل ټینکار کړی چې واک به یوازې د انتخاباتو له لارې سپاري.
