پکتیا چارواکي: طالبانو یو افغاني الاصله سېک تښتولی
د څمکنیو ولسوال عبدالرحمن زرمتي د یکشنبې په ورځ ازادي راډیو ته وویل، چې نوموړی څلور ورځې وړاندې هغه مهال چې دې ولسوالۍ ته د خپل درمسال د زیارت او مذهبي مراسمو لپاره راغلی و، د دې ولسوالۍ د بابوخېلو سیمې اړوند د بنګښ له سیمې تښتول شوی.
د یادې ولسوالۍ د ولسوال په وینا نوموړی د وسله والو طالبانو د یوې ډلې له لوري، چې د پاکستاني استخباراتو ملاتړ له ځانه سره لري تښتول شوی، خو په خبره یې د دې پېښې په تړاو تر اوسه ۵ مشکوک کسان هم نیول شوي دي.
د څمکني په خبره نادان سېنګ په سوېل ختیځ زون کې د افغان سېکانو د مذهبي ځایونو د ترمیم او ساتنې مسئول و، چې دا ځل د معمول خلاف له دوی سره له همغږۍ پرته دې ځای ته راغلی او وسله والو له ځانه سره وړی.
د وسله والو طالبانو له ویاند ذبیح الله مجاهد سره مو یاده موضوع شریکه کړه، خو تر اوسه مو د دوی نظر نه دی ترلاسه کړی.