ازبکستان چینایانو ته د ۷ ورځو لپاره د بې وېزې سفر اجازه ورکوي
د ازبکستان د ولسمشر شوکت میرضیایف د هغه فرمان له مخې، چې پرون (پنجشنبه) یې صادر کړ، د چین او هانګ کانګ اتباع به د راتلونکي ۲۰۲۰ م کال له پیله کولی شي ازبکستان ته بې وېزې سفر وکړي.
خو دا امتیاز به یوازې هغه چینایان لري چې د چین له نړیوالو هوايي ډګرونو څخه په الوتکو کې په مستقیم ډول ازبکستان ته ځي.
خو هغو چینايانو ته، چې له درېم هیواد څخه ازبکستان ته ځي، ۵ ورځینۍ وېزه ورکول کېږي.
د ازبکستان د اوسني ولسمشر د اقداماتو په نتیجه کې دې هیواد ته د بهرنیو سیلانیانو شمېر په ۲۰۱۸ م کال دوه برابره شو.
تېر کال دغه هیواد ته ۵ ملیونه او ۳ لکه بهرڼي سیلانیان ورغلي وو.