د فرانسې ولسمشر له خپل روسي سیال سره وکتل

د فرانسې ولسمشر ایمانوئل مکرون نن دوشنبه په خپل استوګنځي کې د روسیې له ولسمشر ولادیمیر پوتین سره وکتل.


تمه کېږي چې د دوو هېوادونو د مشرانو ترمنځ خبرې د اوکراین په ختیځ کې د کړکېچ د پای ته رسولو لپاره په خبرو اترو کې پر پرمختګ متمرکزې وي.


دوی به همداراز د سوریې د کړکېچ او له ایران سره په اټمي موافقې کې د اوسنیو اختلافاتو په اړه خبرې وکړي.


ایمانوئل مکرون تر دې وړاندې په ۲۰۱۷ میلادي کال کې د پاریس په لمنه کې په ورسای ماڼۍ کې له پوتین سره لیدلي وو.


د فرانسې او روسیې ولسمشران وروسته له دې سره ویني چې د اوکراین ولسمشر ولادیمیر زیلینسکي د روانې میاشتې په لومړیو کې له پوتین څخه وغوښتل چې د اوکراین د ختیځ د لانجې په پای ته رسېدا کې مرسته وکړي.