عبدالکریم خلیلي په نړیوالو د سولې په پروسه کې د همکارۍ غږ وکړ
د سولې عالي شورا د رئيس عبدالکريم خليلي په مشرۍ د دې شورا يو هيئت جنوبي کوريا ته تللى دى.
د دې شورا وياند سيد احسان طاهري په يوه ويډيويي پيغام کې وويل چې ښاغلي خليلي نن د سولې په نړيوال کنفرانس کې پر ګڼو مسايلو بحث کړى دى.
ده وویل:
”غوښتنه يې وکړه چې دغه هېوادونه د افغانستان د سولې پروسې د ملاتړ، د افغان حکومت او طالبانو ترمنځ د سولې د مخامخ مذاکرو د پيل لپاره خپله همکاري او د سولې عالي شورا سره خپله همږغي زياته کړي چې سيمه او نړۍ له تاوتريخوالي، ناکراريو او بدمرغيو خلاصه شي.“
د سولې عالي شورا رئيس کنفرانس ته په خپله وينا کې ويلي چې د نړۍ هېوادونه بايد وضعيت ته په کتو داسې پروګرامونه پيل کړي چې په مرسته يې د افراطيت ايډيالوژيکي ريښې وچې شي.