د هالنډ حکومت په پاکستان کې د خپل سفارت کارکوونکي ورغوښتي
د هالنډ حکومت ویلي چې د اسیې بي بي په نوم د مسیحي مېرمنې مدافع وکیل ته د پناه ورکولو په خاطر یې په اسلاماباد کې کارکوونکو ته ګواښ شوی وو.
اسیه بي بي په پاکستان کې اسلامي مقدساتو ته د سپکاوي په جرم اته کاله زنداني او په اعدام محکومه وه، خو د پاکستان سترې محکمې د اسیې بي بي د جرم د اثبات لپاره د کافي اسنادو د نشتوالي له امله د اکټوبر په ۳۱مه د هغې د ازادۍ حکم وکړ.
د پاکستان د سترې محکمې د حکم تر اعلان وروسته د هغې مدافع وکیل سیفالملوک هالنډ ته پناه یوړه.
د هالنډ د بهرنیو چارو وزیر سټیف بلاک پرون دوشنبه د نومبر ۱۲مه وویل چې سیفالملوک ته د پناه ورکولو له امله په پاکستان کې د هالنډ ډیپلوماتانو ته ګواښونه شوي دي.
د هالنډ د بهرنیو چارو وزیر پر دې مسئله خواشیني څرګنده کړې ده.