ټرمپ: له خاشقجي سره شوی چلند د منلو نه دی
سعودي عربستان په لومړي ځل نن ومنله چې د سعودي عربستان منتقد خبریال جمال خاشقجي په استانبول کې د سعودي په قونسلګرۍ کې وژل شوی دی.
د سعودي عربستان دولتي رسنیو د چارواکو په حواله ویلي چې هغه یو بل ته د لاس اچولو او سوکانو د وهلو په نتیجه کې مړ شوی دی.
خاشقجي د اکتوبر له دوهمې راهیسې له کله چې دی په استانبول کې د سعودي عربستان قونسلګرۍ ته تللی و، تری تم شو.
د سعودي دولتي رسنۍ د دې پېښې په اړه د سعودي څارنوالانو لومړنۍ څېرنې ته په اشارې سره ویلي چې د استانبول په قونسلګرۍ کې د خاشقجي او د نورو کسانو چې له هغه سره یې لیدل، خبره اړول شوې چې خبره د سوکانو ګوزارونو ته رسېدلې چې په نتیجه کې یې نوموړی وژل شوی دی.
څارنوالانو ویلي چې په دې اړه څېړنه روانه ده او اتلس کسان چې ټول د سعودي عربستان اتباع دي، توقیف شوي دي.
د سعودي عربستان عامه څارنوال وویل چې د دغې پېښې په خاطر د شاهي محکمې سلاکار سعید القحطاني او د استخباراتو مرستیال احمد اسیري له خپلو دندو لېرې شوي دي.
سعودي رسنۍ وایي چې پاچا سلمان د ولیعهد شهزاده محمد بن سلمان تر څارنې لاندې د استخباراتو د عمومي ادارې د تشکیل د محدودلو امر کړی دی.