د قرغزستان د بهرنيو چارو وزير استعفى وکړه
دا استعفى په داسې حال کې کېږي، چې د جنوبي کوريا لپاره د دغه هېواد د سفير د ليرې کېدو پر سر کړکېچ ولاړ شوى و.
د جنوبي کوريا لپاره د دغه هېواد سفير کولوچ ليک سلطان چې د اداري فساد د ادعاوو له کبله له کاره ليرې کړاى شوى، وايي هڅه کوي په کوم بل هېواد کې پناه واخلي.
د قرغزستان د بهرنيو چارو وزارت په اعلاميه کې راغلي چې د دغه هېواد د بهرنيو چارو وزير ايرلان عبدالله يف پر دغه مقام تر شپږکلن کار وروسته استعفى ورکړې او ولسمشر سورنباى جين بيکوف يې استعفى منلې ده.
د بشري حقونو د څار ادارې د قرغزستان د بهرنيو چارو د وزير د استعفى هرکلى کړى او ويلي يې دي، چې د ده شپږکلنه دوره له بشري حقونو له سرغړونو سره مله وه.