قادر شاه: د ملي امنيت سلاکار خپل امريکايي سیال سره وغږېد
د ملي امنيت شورا وايي، حمد الله محب پرون په سپينه ماڼۍ کې له جان بولټُن سره د افغانستان او جنوبي اسيا لپاره د امريکا د ستراتيژۍ پر مؤثريت او د ټروريزم په وړاندې پر مبارزه هم بحث وکړ.
د ملي امنيت د شورا وياند قادر شاه نن ازادي راډيو ته وويل، افغانستان له افغان هوايي ځواک سره د امريکا د پوځي مرستو مننه وکړه:
"د هېواد له دفاعي او امنيتي ځواکونو سره د امريکا پر مرستو، په مشخص ډول زموږ له هوايي ځواک سره پر مرستو بحث وشو. د دغو مرستو مننه وشوه، چې په پام کې ده راتلونکى کال افغانستان ته وسپارل شي."
د امريکا متحدو ايالتونو د افغانستان د هوايي ځواک د پياوړتيا او د افغانستان له امنيتي ځواکونو سره د اوږدمهالو همکاريو ژمنه کړې ده.
ښاغلى قادرشاه وايي، د افغانستان او امريکا د ملي امنيت سلاکارانو د افغانانو په مشرۍ د سولې د پروسې پر بهير هم بحثونه وکړل.