دفاع وزارت: زياتو ملکيانو ته د مخالفینو په حملو کې مرګ ژوبله اوړي
دغه وزارت دا خبره د يوناما د هغه راپور په تړاو وکړه چې په کې ويل شوي: د افغانستان په جګړو کې د ملکيانو مرګ-ژوبله د پخوا په نسبت زیاته شوې ده.
د دفاع وزارت د وياند د دفتر سرپرست بريد جنرال محمد رادمنش ازادي راډیو ته وویل، وسله وال مخالفین ډېر وخت د جنګ پر مهال د ملکيانو له کورونو ګټه اخلي چې د ملکي کسانو د تلفاتو سبب کېږي.
ده وویل، اکثره ملکیان د وسله والو مخالفینو په بریدونو، بمي چاودنو، انتحاري حملو او نورو پېښو کې وژل کېږي.
یوناما په خپل وروستي راپور کې ویلي چې د روان میلادي کال په تېرو شپږو میاشتو کې د افغانستان په جګړو کې ۱۶۹۲ کسان وژل شوي چې له ٢٠٠٩میلادي کال راهيسې لوړ شمېر ښيې.