ډونالډ ټرمپ ته د ایران د ولسمشر حسن روحاني خبرداری!
روحاني وویل که متحده ایالات له دغه تړون څخه سرغړونه وکړي له سختو عواقبو سره به مخامخ شي.
روحاني چې نن یې له دولتي ټلوېزیون څخه وینا کوله وویل:
"زه سپینې ماڼۍ ته وایم چې که تاسو په خپلو ژمنو وفا ونه کړئ د ایران دولت به قوي عکس العمل وښیي."
ولسمشر ټرمپ د دغه تړون اروپایي لاسلیک کونکو ته د مې د میاشتې تر نیمایي وخت ورکړی چې د ده په وینا په دې تړون کې وحشتانکې تېروتنې اصلاح کړي که نه متحده ایالات به ترې ووځي.
ټرمپ خبرداری ورکړی چې هغه بندیزونه به نور تمدید نه کړي چې د دغه تړون له مخې پرایران لیرې شوي.
د دغه تړون له مخې چې په ۲۰۱۵ کال ایران له متحدو ایالتونو، روسیې، بریتانیا، فرانسې، چین او جرمني سره لاسلیک کړی، پر دې هېواد د لوېدیځ له خوا لګول شوي بندیزونه لیرې شوي او تهران هم په بدل کې خپل اټمي پروګرام محدود کړی دی.
د ایران ولسمشر چې دغه وینا یې په تبریز کې په زرګونو راټولو شویو کسانو ته کوله وویل چې که هرڅوک دغه تړون ته خیانت وکړي باید پوه شي چې هغه به جدی عواقب ولري.
د هغه په وینا ایران هر ډول احتمالي وضعیت ته تیاری لري.