د بلخ پولیس په مزارشریف ښار کې د جرایمو زیاتوالی تأيیدوي
د مزارشریف اوسېدونکي شکایت لري چې له څو میاشتو راپدېخوا دې ښار کې امنیتي وضعیت کرکېچن شوی او هره ورځ وسله والې غلاوې، مرموز قتلونه او د نا څرګنده وسله والو له خوا د خلکو تهدید او ځورونه د زیاتېدو په حال کې ده.
دوی له امنیتي او کشفي ارګانونو د روان وضعیت د کنټرول غوښتنه کوي او غواړي چې په دې ښار کې د جرایمو د زیاتېدو مخه دې ونیول شي.
بل خوا د بلخ د امنیت امر عبدالرزاق قادري په مزارشریف ښار کې د جرایمو د زیاتوالي اساسي دلیل په دې ښار کې د نفوس زیاتوالی بولي او وايي چې نسبت تېر کال ته په بلخ ولایت کې د جنايي جرایمو سطحه ټيټه شوې، خو د مرموزو قتلونو موجودیت، وسله والې غلاوې او د نا معلومه وسله والو له لورې د لارو نیول تأییدوي.
دا په داسې حال کې ده چې د بلخ د حوزوي روغتونو د مسؤلينو په قول چې یوازې په تېرو دوو ورځو کې له مزارشریف څخه د دری کسانو جسدونه چې په مرموز ډول وژل شوي، یاد روغتون ته انتقال شوي دي.