Norwegian hadde eit resultat på 1248 millionar i andre kvartal. Det viser kvartalsrapporten for Norwegian som omfattar månadane april, mai og juni. Rapporten inkluderer dermed ikkje perioden då det var SAS-streik.
Norwegian leverer det første positive driftsresultatet sidan 2019, altså sidan før pandemien. Selskapet omsette for 4,8 milliardar og driftsresultatet enda på 1,36 milliardar kroner. Tala for andre kvartal er prega av passasjerauken, men også av høge drivstoffprisar.
– Dette kvartalet viser at vi er tilpassingsdyktige og at vi raskt kan justera drifta til ein aukande etterspurnad, seier konsernsjef Geir Karlsen i ei pressemelding.
– Det er framleis ei krevjande tid for luftfarten, med kapasitetsutfordringar ved ei rekkje flyplassar i Europa og vi har hatt flyteknikarstreik i Norwegian, legg han til.
I andre kvartal hadde selskapet 5 millionar passasjerar, opp frå 400.000 passasjerar i same kvartal i fjor då selskapet var råka pandemi.
Ein annan grunn til at tala er høge, er fordi dei inkluderer tilbakebetalinga Norwegian kravde frå Boeing etter dei gjekk i søksmål mot selskapet.
