Лавров: Нападот на САД врз провладините сили во Сирија е нелегитимен

Министерот Лавров го даде коментарот по завршувањето на сесијата на комитетот на министри на Советот на Европа во Никозија.

„Засега сѐ уште ги прецизираме деталите, но, според некои соопштенија, неколку десетици цивили загинале како резултат на тој напад. Ќе повторам, сето тоа треба повторно да се провери“, изјави Лавров, пренесува RT.

МНР на Русија реагира на нападот на САД врз владините сили во Сирија

Како што истакна министерот, американската команда се обидела да го оправда нападот со тоа што провладините сили претставувале закана за опозицијата која соработува со американската војска и со коалицијата предводена од САД.

„Каква и да била причината за одлуките кои командата на САД ги донесе за извршување на таков напад, тој е нелегитимен, тој е незаконски. Тоа е уште едно грубо прекршување на суверенитетот на САР“, потенцираше Лавров.

Според него, алармантно е тоа што почнува да станува нејасно поимањето на неопходноста за обединување на напорите на сите кои им се спротивставуваат на терористите.

Лавров исто така истакна дека постои стремеж на Вашингтон да ги сврти опозиционерите и некои екстремисти, меѓу нив и „Џабхат ан-Нусра“, против владата на Сирија по повиците за прекинување на контактите со сирискиот лидер Башар Асад.