Пожар над Батинци, Ангелов: Имаме целосна контрола, постојат сомнежи за подметнување

Попладнево избувна силен пожар над селото Батинци, општина Студеничани, кој предизвика паника кај локалното население поради сомнежи дека повторно гори депонијата „Дрисла“.

Директорот на Дирекцијата за заштита и спасување (ДЗС), Стојанче Ангелов, од терен изјави дека пожарот е ставен под целосна контрола.

„Имаме целосна контрола врз пожарот над селото Батинци. Се работи за силен пожар за кој има индиции дека е намерно подметнат, бидејќи одеднаш се разви поголема линија во долот,“ рече Ангелов.

Пожарот избувнал околу 13 часот, а поради силниот ветер брзо се проширил. Скопската противпожарна бригада интервенирала со неколку возила, а во акцијата биле вклучени и два пинцгауери на ДЗС, управувани од полицајци од ЕБР.

„Бидејќи пожарот се движеше кон Батинци и постоеше опасност да биде зафатено и самото село, по барање на директорот на ЦУК, Муахмед Али, испративме и еден хеликоптер на МВР, како и два ер трактори на Дирекцијата. Тие помогнаа брзо да воспоставиме контрола. Сè уште има горење во долот, но продолжуваат со дејство ер тракторите и хеликоптерот. Верувам дека набргу ќе биде ставен под апсолутна контрола, а потоа и целосно изгаснат,“ изјави Ангелов.

Тој додаде дека истрагата треба да утврди кој стои зад, како што рече, „намерното подметнување на пожарот“.